Ka Dorbar Chnong Umkiang da e por ko le tayaw ya ka NHAI/NHIDCL wow pynchna ya u sarok NH- 6 wei wow chna ya ki dooid ha rood sarok (Side Drain) ha ki thaaiñ Umkiang wei lada ym leh ya itæ daw ya mih paidbah wow khang sarok wa lai na Jowai cha Silchar.
Ini toh hajrong ka yurim wa da boon boon sien kiwa yahkhmat chnong da lai kyrpaad ki ya ka Company wa toh u pait ka GRIL wow siang rong wei wow chna ya ki dooid kiwa biang, tangwa ym em leh kamwa da kular na i por cha i por.
Da ong wa i chna ya ki dooid kiwa em i jooh i jrong kat u sarok ha ki thaw wa man loom da pynman ya ka um wow kai ko najrong sarok wei na ini i daw wa u sarok smat u wow sih nei wym biang rukom chna dooid ka NHAI.
Chooh chooh da ong wa i sih u sarok da ktah ko chiboon ya ki paidbah khamtam ki khynnah skur kiwa lai man-ka-sngi lyngba utai u sarok uwa sa du i laphooh wa hær hawa lai ki kari iwa da hap ki bru wow riñ mynsien iwa da pynkjut khlieh, pynsynrum wa kiwi de ki chitom khamtam ha kini ki por wa em ka khlam COVID-19.
Ka kyrwoh na u Lasting Pala, Waheh Chnong Umkiang.
