Ynne ka 11 tarik kawa man leh ka sngi nyngkong wa wai ya ki yaw wa em ha Jowai hadien wa pynkrehkaam ya ka Weekend Lockdown, da man ko kawa lyngam hadien wa ka Seiñraij Jowai da rai ko ynnin ka sngi wow khang chwa ya ki yong ka wa em ha Iawmusiang.
Ka yaw Pohyaw, Iawmusiang kawa em hapoh i pait ka Dorbar Chnong Tympang Iawmusiang leh man ko kawa lyngam deiwa wai ya ki dukan da ka Odd/Even Number kamjooh leh ka Iaw Chor man ko kawa duna kiwa wai heiwa ki thaw chongdai man ki kiwa ym em wa chongdai wei da wai ki kattu katni ki dukan deiwa bood ya ka pali.
Kiwa rap boon kiwa chongdai toh ha Yaw Chyiap tangwa heini leh duna ki bru wa wan thied.
Hawa lai pait ya ka Lay-by Market kawa em ha Ialong heipor janmiet, kani leh man ko kawa duna bru kamjooh duna kiwa chongdai.
