U Montri Rangbah ka jylla, u Conrad K. Sangma da ong u wa i stat Technology da krehkaam bha ko ha i synchaar khadar wei yeini da ong u ha ka Global Dialogue Security Summit wa pynman ha Shillong.
Da ong u wa ka IT (Information Technology) da yarap ko wow booddien ya ki Scheme sorkar wei wow pyntikna wa i chakri poi i ha ki paidbah.
U Conrad da ong u wa deiwa pynemkaam ya ini i stat da ye wow booddien ya i chait i khiah ki kynthai wa pun-khon lyngba ka ‘MOTHER Programme’, heiwa ka sorkar da ye ko wow pynchlur ya i kha khon ha ki thaw sumaar heiwa da kyrmen wow kynjoh 70% ha ki le snem wow wan wei kamjooh wow pynduna ya i khlaad ki manbei heipor kha-khon.
Heiyatoh wa ki Project chna sarok wa ka Internet da yarap bha ko wow booddien ya ki kreh hapoh ka jylla, da ong u Conrad.
Chooh chooh da ong u wa toh u chim kabu ya i stat ka juk katni heiwa emkaam wow pyntikna wa ki tiar wa pynemkaam namo ki Information Networks and System toh kiwa soi, kiwa miat wei kiwa ye u chaniah khnang wow wanrah ya i chaniah ha ka Internet.
Heijooh i por da ong u wa ka Information Technology da wai luti ko ya ki khynroo khyllood u yoh kreh ki wei toh u pynemkaam hok khnang wow ye u yoh myntoi na ki neibynta wow ku ka khayi pateiñ wa kamjooh i yoh i laa ka thaaiñ wa ka ri waroh kawi.
