Jowai: Haka sien wa nyngkong da pynman yaka Latuthiñ Festival da ka Rymbai Elaka Tourism & Environment Society (RET&ES) East Jaiñtia Hills District ha kchaaid Lamu wa em ha Chnong Iapmala.
Kani ka tamasa da sdang ko nadooh ynne ka sngi hei wan sakhi lang u Kennedy C Khyriem, u MP ka Shillong u Vincent H Pala, u Deputy Commissioner East Jaiñtia u MS Lhuid, u MLA ka thaiñ u Justine Dkhar, ki arngut ki MDC ka JHADC ka Violet Lyngdoh u J.R. Pyrtuh wa kiwi kiwi ha ka yalang wa pyllai da u Dolloi ka Elaka Rymbai u E. Swer.
I pynman ya kani ka tamasa toh chibynta wow kyntu kynrong ya ka kaam uiñke suwari hapoh ka District lyngba i em ki thaw wa e kyrpang ka bei rymaw soodong sookun wa yoosuk wei ya kani ka sngi da jied leh u pynman ha chnong Iapmala kam chibynta wow pyntipmit ya kawi na ki kchaaid wa tip kam ka kchaaid Lamu, heiwa ki bru haap ki u lai luti na Rymbai, na Umshong yow poi ha ka chnong Iapmala.
“Hei pait i yoo yong i kam ka Elaka yoo wa emkaam bha wow em ka Society neibynta u pynbha pynmiat ya ki thaw wa yoosuk wa da e kyrpang u Blai yow man kam ki thaw uiñke suwari, yow riñ ya ki bru na kylleiñ ki thaw u poi ki cha kani ka thaiñ” da ong u E. Swer Dolloi ka Elaka Rymbai kamjooh leh uwa man kam u President kani ka seiñ.
Da khana u leh kamwa boon hi ki paidbah yong kani ka thaiñ angnood ki u kyntu kynrong ya ki thaw paitke kam cha kiwi tawon ki thaw, yooluti u wa lada ye u lai chakhmat u yarap e khih e kreh ko ya ki khon ka thaiñ nalor wow yoh ki leh boon i stat i tip.
Hei yaklam wa u Deputy Commissioner ka District u MS Lhuid da ong u kam kiwa pyllai ka Society da wan ki cha oo wa kwah ki u pynku ya kani ka thaw wei dap ki dei kmen neibhah kam ka District Administration hi da lai ko chakhmat yow pynku ya ka kaam uiñke suwari yow yoh khih yoh kreh ki paaid ka thaiñ kamtæ da e ki chiboon i kyrchaan.
Da khana u leh wa na kani ka chnong Iapmala, chakhmat won em ka Lechka kawi naka thaw wa yoosuk, wow pyn ka-it ya kiwa paitke wei kawa ye leh u mih lyngba chadooh Amlarem Civil Sub Division, West Jaiñtia Hills ka thaw wa em chiboon ki thaw paitke.
Da pyn chongchit da ki Chaad tynre na ki Raij ki chnong waphær waphær wa haap hapoh ka Rymbai Elaka, heiwa hei janmiet won da yoh yei rwai i put i tem naki dhab tem waphær waphær.
Discussion about this post