Ka World Vision India kamjooh ka seiñ saiñpyrthai ka People’s Democratic Front (PDF) Zonal Committee, Mawkynrew Constituency, ynnin ka sngi da e sñiawbha ki da ki tiar yada na i kjut COVID-19 kam ki PPE Kits, ki Surgical Gloves, ki Hand Sanitizer, ki Facemask cha ki wakreh ka chnat i chait i khiah ha ki PHC wa ki Sub-Centre kiwa haap ha ka Mawkynrew C&RD Block lyngba ka Mawkynrew PHC.
Neiliang ka Dr. I Syiem, In-charge Mawkynrew PHC, da pynsñiaw ko yei e khublei yaka World Vision India kamjooh ya ka PDF kiwa da kyruiñ khmat wow yarap ya ki wakreh ka chnat kiwa em hakhmat dooh hei yakhun yaka khlam COVID-19 da kitai ki tiar yada na ini i kjut. Kine ki tiar yada na i kjut COVID-19 daw pynpoi won cha ki PHC, Sub Centre cha ki wakreh ASHA wa Aganwadi ha ki chnong waphær ka Mawkynrew Block.
Neiliang u MLA ka Mawkynrew Constituency, u Banteidor Lyngdoh uwa man leh u montri sorkar deiwa pynsñiaw wa da dep u wow yaklam waka sorkar wow pynyoh kawi ka Ambulance neibynta ka Mawkynrew PHC, da ong u, “Nga da yoo O yei kreh chitom ki wakreh ka chnat i chait i khiah nadooh ki wakreh ASHA wa Aganwadi, ki Nurse, ki Doctor ha ini i yaleh wei sñiaw O wow e khublei kyrpang ya ki. Nga e khublei O yaka World Vision kawa da pyrkhat wow yarap lang yaki wakreh ka chnat i chiat i khiah wei nga yooluti O kamwa jooh e yaka chakri daw pteiñ wow leh kamtæ hi ha ki por ki sngi kiwa daw wan”.
Ha ka yalang da emlang leh uwa yahkhmat ka World Vision India wa kynthup ya u Seijang Haokip, Program Manager, kiwa yahkhmat ka PDF Mawkynrew Constituency wa kynthup ya u A Rynjah, President, u D. Lymba, Finance Secretary wa kiwi kiwi.
Discussion about this post