Ka Jaiñtia Fishing and Environmental Protection Association (JFEPA) kawa man kawi na ki seiñ kawa da kreh yow yada yaka wah Myntdu ha ki bynta kiwa em haka chnong Jowai. Ka JFEPA man ko leh kam ka rynsan kawa ya krehlang wa ki seiñ waroh kiwa em hapoh ri-loom Jaiñtia kiwa yaleh wow pynneh pynsah ya ki um ki wah wa ki dohum kiwa em ha ki.
Kawi na ki kaam wa hakhmat dooh yong ka seiñ toh wow pynneh pynsah yaki dakha kiwa em ha Syntu Ksiar deiwa sdang yaka Fish Sanctuary næ ka thwai psan dakha ha kani ka thaw. Da chna leh boontylli ki Dam haka wah Myntdu wow yada ya ka wah nei chah pynsih ha ki bru wa khwan mynstoi samen.
Ka Syntu Ksiar najrong wa man ko i thaw wa em i parom wa yatoh wa i yaleh pyrchah ki Pnar yaka sorkar pharæng. Katni deiwa em kani ka thaw psan dakha, da taan chooh chooh ko ya kiwa wan uiñke suwari cha kani ka thaw.
Ha i por kiwa da lai, ka JFEPA deiwa ya krehlang wa ki bor sorkar da leh ki chiboon ki kaam wow pynneh pynsah wei yada yaka wah Myntdu nei chah pynsih ha ki bor ki wym sñiawngooh wei ym burom ya kani ka wah kawa psa um yaka chnong Jowai wa yaki pynthor kba ka Pynthor Neiñ waka Pynthor Wah kiwa psa khoo yaki bru.
Ha kani ka kynti, ka seiñ kam chibynta wow yada yei tooid yong ki jakhlia na ki bynta ka Iawmusiang cha ka wah Myntdu, ka JFEPA da pynkhreh ko wow chna yaka Check Dam yow khanglaad yei tooid ki jakhlia cha ka wah. Kamjooh neidaw wa ka Iawmusiang man ko leh ka yaw kawa heh ha ri-loom Jaiñtia wei hadooh katni ki jakhlia kiwa mih na ka yaw tooid ki cha ka wah wei ini da booh ko yei maa ya kiwa chong chnong yong ka chnong Jowai kiwa pynemkaam ya ka um neibynta i emkaam yong waroh.
Kamtæ ynne ka sngi ka JFEPA hapoh i yahkhmat yong u President yong ka u Lamwan Paswet, u Secretary u N.K. Lamare deilang wa ka Committee chnong yong ka Dorbar Chnong Tympang Iawmusiang hapoh i yahkhmat u Eddie Stone Shylla wa u General Secretary u Ajoy Lywait wa kiwa yahkhmat yong kini ki arliang da lai pait ki yaka thaw wow chna ya kani ka Check Dam.
Waroh arliang da ya mynjur ki ya ka thaw kawa biang bha wow chna ya kane ka Check Dam toh ha Chahtngit kawa haap hapoh i pait yong ka Dorbar Chnong. U Lamwan Paswet, President yong ka JFES da ong u wa ka poisa wow chna ya kani ka Check Dam toh kawa daw wan na ka MP Scheme yong u Vincent Pala wei da ong u leh wa kattu ka seiñ daw sdang pynkrehkaam noh ko ya kani ka kaam.
(Feature Image-File Photo)
