Shillong: Ka Khasi Hills Autonomous District Council (KHADC) daw chna khyrdop noh ko ha ki kattu katni ki luti wa psiah cha Iewduh, kawa haap hapoh i pait yong ka Hima Mylliem. Ka Iewduh toh kawi na ki yaaw wa heh dooh ha ka jylla Meghalaya kawa da seiñ nadooh ki por warim da ka Hima Mylliem.
U Executive Member wa pait ya ka yaaw ka hat ka KHADC u Hadrian Lyngdoh da pyntip u wa i kaam heiyatoh wa ini dang lai ko cha khmat wei ym slem de u sdang yeini i kreh.
U EM leh da pyntip u wa ka KHADC da dep khut tender wei da mang poisa ko hadooh T. 51 lak wow chna ya ki 3 tylli ki luti wow psiah cha Iewduh kitæ toh na khmat Motphran, na Iewmawlong wa na Khliehiew.
“U chna i ya ka khyrdop deilang wa ki Khilon wei i thmu hajrong kani toh wow pynmiat ya kani ka yaaw wow riñ ya kiwa dai mar kamjooh ya ki paidbah”, da ong u Hadrian.
Da pyntip u leh wa i mang poisa neibynta ini waroh da wan na ka Special Assistance ka sorkar pyrdi yong u snem 2015-16.
Katkam i ong u Hadrian, i dur i dar yong ka Iewduh ym em man i iwa miat neibhah wa dap sa du i jhep wa paarsnieh, wei emkaam wow pynkhooid yow pynmiat ya ka hei rukom wa biang.
“I da dep ong i ya u Syiem ka Hima Mylliem wow thung bru wow pynkhooid chooh ha Iewduh wow pait ya ki dooid, ki luti yow man ki kiwa khooid.” da ong u Hadrian.
Discussion about this post