Jowai: Ka All Jaiñtia Cricket Association (AJCA), WJHD da pynkut ko ya ka Jaiñtia Cricket Tournament 2018 yong ka kawa pynman mar 20 Over chiliang ha madan Thymme, Lumpyrdi Mihmyntdu.
Ka yakhun Final da pynman hapyrdi ka Rising Star pyrchah ya ka Moodymmai CC kawa da jop da 5 Run lyngba ka Super Over.
Ka Moodymmai da jop ko ya ka kylla-khlem wei da jied ko wow kawang bol nyngkong. Neiliang ka Rising Star da kamai ko 72 Run deiwa dooh ya waroh ki Wicket ha ka 15.2 Over. U Rimiki Lyngdoh da kamai boon run u deiwa yoh 27 Run wa u Jemi Laloo uwa yoh 20 Run.
Katwa kiwa kawang bol ka Rising Star kiwa da pynhaap boon dooh ki Wicket toh u Marshal Pariat, u Moses Pyrtuh wa u Richel Passah kiwa da yoh mar le Wicket.
Ka Moodymmai CC hawa kdong ko ya ka thong da kamai ko thij 72 Run deiwa haap lut waroh wa ryngkat wa ki Run wa yoh ka Rising Star. U Marshal Pariat da kamai Run boon dooh u deiwa yoh 29 Run.
Kiwa kawang bol ka Rising Star u Peter Lamare wa u Bormi Rngad won da yoh ki mar le Wicket.
Kamtæ yow rai ya kiwa jop neidaw wa pyn-ar da ye ki u kamai ka jooh ka Run wei da haap leh waroh ki Wicket pyn-ar liang, da pynman da ka Super Over namo ka chi Over wow kamai boon Run dooh yow jop.
Ha kani ka Super Over ka Moodymmai CC da kamai ko 10 na ka chi Over katwa ka Rising Star won kawa kdong won da yoh ko 5 Run. Kamtæ ka Moodymmai da jop ko da 5 Run.
Ya ki khusnaam cha ki wajop da saam da u Shriam Ryngkhlem, Chairman ka Dorbar Chnong Mimyntdu uwa man leh kam u Secretary ka Sports Committee ka chnong.
Ya i naam Player of the Tournament da yo u Marshal Pariat ka Moodymmai.
Discussion about this post