U MDC ka JHADC uwa man leh kam uwa e ktien ka Council, u Phasmon Dkhar ynne ka sngi da pynsñiaw u yei mynsien wa kmen hadien wa u Montri Rangbah ka jylla, u Conrad K Sangma da pynbna u ha ka Dorbar Mang Tangka ka jylla wa daw e T. 12 klur neibynta ka Iawmusiang Shopping Complex.
Da ong u wa deiwa yoh ya kani ka poisa daw ye wow pyndep hadooh 70-80% i kreh ha kani ka Complex neibhah katkam wa man katni i kreh ha kani ka thaw da man i 40% iwa dadep.
U Phasmon da kyrmen u leh wa lada i kreh lai bait i daw ye u pybdep ya ka First Phase kani ka Complex heiwa daw ye wow wai ya ka ha u snem 2023-2024.
