Ka Director General of Police (DGP) ka jylla, ka Idashisha Nongrang da pyntip ko wa da em i pyrchang pynpsiah dkhot ka Hynniewtrep National Liberation Council (HNLC) wei ini toh deiwa yaklam hapoh ki rynsan Social Media.
Da khana ko wa u Samuel Wahlang Pahsyntiew uwa da wan pyndem noh ha ki pulit ha Mairang, da ya krehlang u wa i takit ki pulit wei da chem wa iwa boon hi i pynpsiah dkhot toh deiwa yaklam lyngba ki Social Media heiwa ka HNLC da paan ko leh ya ka EPIC. Da khana ko leh wa u Banjop wa u Donbok toh kiwa da ya krehlang wa ka HNLC wei da chah kem noh ki na Umsning.
Katkam wa khana ka DGP, da ong wa i pynskem dkhot ya ki khynroo da leh deiwa kular wow e dei su wa rap heh wa hei pyrtuid ka ri wa ka jaitbru.
Hawa kylli, ka DGP da ong ko wa hadooh kattæ ym pu tip tikna katwon ngut kiwa psiah thymme cha ka HNLC kiwa da lai cha Bangladesh, wei da pyntip ko leh wa na ka takit da chem toh kiwa na kylleiñ ka thaaiñ Khasi-Jaiñtia.
Neiliang ka DGP da kyntu ko ya ki khynroo wow pyrkhat bha lada em kiwa pyrchang wow pynbiej psiah dkhot da ki kular su tulop, deiwa ong toh wow pait ya iwa da jia ya kiwi kiwa da wan pyndem noh du hadien kattu katni por.
Discussion about this post