Ka seiñ Jaiñtia Student’s Movement (JSM), Eastern Region lyngba ka khubor na u President u Wellson R.D. Siangshai da dap ko dei sñiaw lyngngoh wa i chrai wa khroo hadooh kattæ kattæ hadien wa da yoh yutip wa da e jamin ya uwa dang chah bichaar wa emkti wow tynyap ya ka Ebamon Siangshai kawa na ka chnong Pamrakmai, East Jaiñtia Hills District du hadien wa chah kset u 3 bnai.
Ka seiñ da ong ko wa ini i leh ki bor ka aiñ da pynkthang ko ym du kiwa ha yung ha sem ka Ebamon Siangshai wot ki paidbah wa chong chnong yong ka District leh, wei ini da pyndooh kyrmen ko yei chaniah ha ki bor yong ka aiñ.
Ka seiñ da ong ko wa ha ini i rukom wot ya ki kaam pynyap bru ki kyndon aiñ ym pynrkhiñ wei wow pynchitom katkam ka kyndon kamtæ ym em yumut iyi iyi. Ini i tlot yong ka aiñ nang pynchlur chooh chooh ya ki bru thrangsnam ki bru chim kabu wei daw nang pynkharoi ya kam kini ki kaam damok.
Ka seiñ da beiñ joor ko yei tlot ka aiñ wow kdoh u khoom ya kam kini ki kaam wymman kiwa ym ye wow pdiang ha ka imlang sahlang. Wei ym chong klikti wei daw booddien wa ka aiñ pynchitom ko ya u bru thrangsnam katkam ki kyndon yong ka.
