I kam ka sorkar wa ya ka dan (Cess) wa ah na i Petrol wa Diesel da pynlai cha ka puræ puthi ka jylla, da pynlyngngoh ko ya kiwa sikai neibhah wa ha jylla Meghalaya kiwa sikai da maad ki yei eh wot wow yoh ya ka tulop leh hap ki wow yakhih wei mih cha sarok boonsien.
Uwa yahkhmat ka Khasi Jaintia Deficits School Teachers Association (KJDSTA), u Kular Khongjirem da jubab u yei klam u Symbood Montri Rangbah, u Prestone Tynsong, deiwa ong wa i klam da pynlyngngoh ko ya kiwa sikai neibhah ka tulop leh yoh ki chisien 3 bnai, nalor ki Arrear ki wym yoh de kattu da boon snem.
Da ong u wa kammon ka sorkar ka kam ko wa ka dan na phniang kari lai ko cha ka puræ puthi, heiwa wot ya ka Right To Education leh ym em pynkrehkaam ha ka jylla, khamtam wow pynbiang yei nang i stat wa khlem emkaam su neibynta ki khynnah wa wan na ki manyung wa dooh.
Da ong u wa lada ka sorkar kam ko wa ka dan nei phniang toh neibynta ka puræ puthi, ileh wym em pynbiang ka tulop kiwa sikai, ileh wym em pynbiang ya i thaw puræ wei ileh ym em e sikai ya ki khynnah katkam ka RTE.
U Khongjirem da ong u wa ka sorkar toh u pynche ko hadooh katwon klur da yoh lum dan ko neibynta ka puræ puthi khnang wa kiwa sikai leh u che ki, lym kamtæ daw wanrah yei artatien ya kiwa sikai.
