Ka seiñ Meghalaya People’s United Front (MPUF) Central Governing Body MPUF-CGB da lyngoh ko hajrong i mih yong ki Weighbridge hapoh Jaiñtia Hills kamwa mih ki tit wei ini da ktah sakhiat ko yaki tre kari wa ya kiwa yah kari.
Ka seiñ da ong ko wa dang ini wa dep da mih ka Weighbridge ha ka chnong Khliehtyrshi kawa em hapoh West Jaiñtia Hills, wa kani da em kamwa soo tylli ki Weigh Bridge du ha u National Highway 44 uwa haap ha ki thaaiñ Jaiñtia. “Hei yong sakhiat toh u em du ar tylli ki Weighbridge ha u NH-44 wei ini i rukom leh yong ka sorkar kawa da palat sakhiat kat dang mih ki sngi da ki buit wa ha rukom wow baam wow kjit na ka muna kiwa dooh heithaw waka sorkar toh u yarap ko yaki paidbah.”
Chooh chooh ka seiñ da ong ko wa ini da pynyoo che yei man arsap ka sorkar, kawa e daka tidiang wei kjit ko da i timun. Ka sorkar toh u pyntip chwa ko cha ki paidbah chwa wow leh kiwon kiwon neibhah da chna sorkar ym toh neibynta yong samen, wa toh ki paidbah wa pynkham bor yaka wei na ini i daw ka sorkar toh u burom ko ya ki paidbah ym toh wow leh embor.
Kamtæ ka seiñ ka dawa ko naka sorkar wow pyndam noh yaki kattu katni tylli ki Weighbridge hapoh Jaiñtia Hills khnang wa ym ktah joor yaka kata ki tre kari wa kiwa yah kari, pynkut ka kyrwoh na u General Secretary ka seiñ u A. Syad.
Discussion about this post