Ki Dolloi ka Ri-loom Jaiñtia hapoh ka satri yong ka ‘Dolloi ka Ri Jaiñtia’ da hiar ki cha chnong Mukroh ynne kawa em hapoh ka Elaka Shiliang Myntang, West Jaiñtia Hills wow pynsñiawlem heiyatoh wa i chah siat yap ki 5 ngut kiwa chong chnong ka chnong heiwa da pynman leh yaka yalang ha i thaw wa tip kam ka Madan Mucher.
Hawa e yei klam ha kani ka sngi, u Chairman ka Dolloi ka Ri-Jaiñtia, u Chawas Lyngdoh da ong u wa hadien wa yoo yeini i chah yoohroit ki paidbah wa chong wa sah da sñiaw lakam wa i ymtoh de kiwa chong chnong ka ri India.
Da ong u wa em ki Dolloi haap u pood waka ri Bangladesh tangwa ini i chah siat yap ha chnong Mukroh won pynyoo i wa lakam wymtoh wym em de i ha ri India neibhah wa da chah thombor ki bru yong i pyn hapoh u pood ka ri.
Chooh chooh da ong u wa katni em i hapoh ka ri wa ka jylla wei lada heipor ki Syiem da toh u rah ya ki suloi, ki wait, ki stieh ki wow yada yaka chnong na kiwa pyrchah ya i.
Da ong u leh wa katni ymtoh de i por yongrim wow ye i wow rah ya ka suloi waka wait kam ha itu i por nynde wei katni sah i bor kattu ha ka sorkar India, ka sorkar jylla wa ka sorkar District.
U Chawas Lyngdoh hawa kynmoo yei por nynde ha ki snem 2003 da ong u wa ka Labang Nongphyllut Pangam Raliang da chah beh ki wei da phet wiar ki ha Sahsñiang katwon pynyoo yeiwa chah lehbeiñ ki khon ka Ri-Pnar iwa da pteiñ hadooh katni, dang chah lehbeiñ ki wei ini pynyoo i yei chah thombor ki.
Da ong u leh wa kam ka Dorbar ki Dolloi ka Ri Jaiñtia sñiawsih ko wow yoo yei chah tynyap para wa chong ha ka ri India du neidaw wa phær ka jylla Meghalaya wa Assam.
Heijooh i por da kyntu u ya ki bor ka sorkar India khamtam ya u Montri Rangbahdooh ka ri, u Narendra Modi wow chimkhia u yeini i kaam yong i wow thooh ki laad ki luti neibhah hawa para ri daw dooh yei snaam.
Da ong u leh wa da toh i por wow kær naarchieh noh para jylla khnang wow wanrah yei chongsuk.
