Jowai: Ka Meghalaya SSA School Association (MSSASA) Central Body ynne da maham ko wow dam kreh ki ha waroh kawi ka jylla lada ka sorkar jylla ym pyllait ko ya ka tulop yong ki chwa ka 8 Kmaichonglad (December).
Ha ka khubor wa pyllait da u Aristotle C. Rymbai uwa man kam u President ka MSSASA Central Body da ong u wa ka seiñ da e dorkhat ko cha u State Project Director SEMAM-SSA u Ambrose Ch. Marak heiwa da kyrpaad ko na ka sorkar jylla lyngba ka SPD wow pyllait ya ka tulop wa dang sah yong ki 12,481 ngut kiwa sikai SSA wa kynthup ya ka Arrears wa sah nadooh ka 2016-17 nadooh 1 Naiynñiaw 2016 hadooh 28 Thohlakhmi (February) 2017 wa ka tulop wa soo bnai yong uni u snem nadooh u Naisaphra (August) hadooh Khonchonglad (November).
U Rymbai da ong u wa kiwa sikai SSA katni ym em poisa de ki wot hadooh wow su ya ka bai skur ki khon, ka Bill Light, ka bai yung wa kiwi kiwi.
Ka Association da jooh e dorkhat ko dei langær cha ka sorkar jylla tangwa waroh man i iwa sepai neibhah wa ka sorkar ym mano ko yeiwa emkaam kiwa sikai SSA.
Lyngba ka MHRD Govt of India da hukum ko ya ka sorkar jylla wow booh bhah ya ka poisa neibynta wow pynkrehkaam wei wow pyllai bait ya ki kaam yong ka SSA tangwa ka sorkar jylla hadooh katni ym em u leh ko yeiwa emkaam.
Heijooh i por da ong u wa ki sahep yong ka tnat Education Department dei langær thooh ki cha ka sorkar jylla wow pyllait ya ka poisa cha ka State Implementing Society SEMAM-SSA na ka bhah poisa ka jylla khnang wa ka SEMAM-SSA u ye ko u pyllait ya ka poisa wa ka tulop yong ki 12,481 ngut kiwa sikai SSA.
Ini i wym mano ka sorkar jylla da lai lait ko ya ka Section 7(5) yong ka RTE Act 2009.
Hei yatoh wa ka hukum ka SPD ha u 24 tarik uni u bnai u Rymbai da ong u wa ka Association da e por ko ya ka sorkar jylla lyngba ka SPD wow pyllait ya ka poisa ha cha ka 8 Kmaichonglad wei lym kamtæ ka Association chirup wa ki 12,481 ngut kiwa sikai SSA daw yakhih yonglang ki.
Discussion about this post