Maham e mukotduma u khynroo na EJH pyrchah ya ka BJP wa pynemkaam ko da i video yong oo

Jowai: U Kynjaimon Amse uwa na ka chnong Umkiang da maham u wow e mukotduma pyrchah ya ka BJP Meghalaya neidaw wa pynemkaam ko ya i Video yong oo khlem yohbor na oo ha ka Election Video ka BJP kawa rwai u Lou Majaw kawa e pyrtuid “Let the wind blow everywhere”.

U Amse da ong u wa i Video yong oo wa pynemkaam ka BJP toh iwa riñ u wow pynyoo wa sih u sarok wa lai cha ka chnong Huroi wei da booh u ya i Video yong oo ha YouTube wa ha Facebook.

Ini i Video yong u Amse ye u chem ki leh ha i bynta 1:38 i Video ka BJP wei u Amse da ong u wa ini i leh ka BJP toh iwa pyrchah ya ka aiñ heiwa i Video yong oo da yada da ka aiñ Copyright Act 1957 wa khang u pynemkaam khlem yohbor.

U Amse da ong u leh waka BJP ym du tooh ko yei Video yong oo heijooh i por leh ym em pynmih pyrtuid ko ya u Amse kam u tre i Video kiwa da booh ko ha ki Social Media wa kiwi kiwi de.