Shillong: Kiwa kreh kam ki Jugali (Lineman) hei kyrchaan lang ka Khun Hynniewtrep National Awakening Movement (KHNAM) ynne ka sngi da sdang ki ya ka chah thngan wa khlem booh por kamjooh wow dam kreh haphrang ka yung krehkaam ka Meghalaya Energy Corporation Limited (MeECL), Shillong kam ka dak wow pyrchah yei slem u thung kreh pura ya ki 466 ngut ki Jugali kiwa da pass ha ka exam neibhah lada pynslem i hok yong ki wow yoh ya ini i kreh daw kut ko ha ka 2 tarik u Naisaphra.
Kamwa 100 tam ki Jugali da wan ki wow emlang ha kani ka chah thngan tangwa da em ki pulit wa ki ar ngut ki CRPF kiwa khang ya ki Jugali wow lai ki palat ya ka Gate ka MeECL.
Hadien kattu katni ipor wa wan ki Jugali wow sdang yow pynyoo yei pyrchah yong ki, da wan u Chairman-cum-Managing Director (CMD), MeECL u P.S. Thangkhiew, uwa da khut yaklam ya ki Jugali ya iwa dawa yong ki.
Hadien wa kut i yaklam wa u CMD, u President ka Youth Wing ka KHNAM u Thomas Passah da ong u wa u CMD da kular u wow pynyinsur ya ka tarik wa khaddooh sa le bnai wei ya ki chithi thung kreh ya ki Jugali daw phah chwa cha ki 233 ngut kam ka bhah wa nyngkong (Phase I) wei daw phah won sa ya ki 233 ngut wa dang sah kam chibynta ka Phase II.
Da pyntip leh wa u CMD lada ym leh u ya ini daw hair chuki u kam u CMD ka MeECL.
Tangwa kiwa yakhih won ong u wow pteiñ ki yei yakhih yong ki lada ym yoh da ka chithi chaphang ini kamwa da kular da u CMD.
U Passah leh da pyntip u wa kani ka kaam da sah ko da slem wei ki Jugali da dep yachem ki wa ka sorkar da boon sien tangwa ha kini ki por Election da khuslai wa daw em ki wow chim kabu ya kani ka kaam deiwa thung kreh ya ki bru wa kyrchaan ya kiwa mihkhmat.
Da ong chooh chooh u wa ki Jugali da maham ki wow kyntait ya ka Congress ha kani ka Election wow wan lada ka sorkar MUA-II ym ye ko u leh yeiwa emkaam.
Also Read: Maham ka KHNAM u ujor da ka PIL lada ym thungkreh ka MeECL ya ki Jugali
Discussion about this post