Tura: Ka seiñ A-Chik Youth Welfare Organisation (AYWO) na ri-loom Garo da maham ko wow yaleh da ka Public Interest Litigation (PIL) pyrchah ya ka tnat Horticulture Department ha South Garo Hills wym ye ko u e jubab ya ka RTI wa da booh ha kani ka yungkrehkaam sorkar.
Hadien wa yoh ka seiñ ya kiwa boon ki ujor na ki warep kani ka thaiñ, ka seiñ da e ko da ka RTI ha ka 6 tarik u Wisu (March) heiwa ym pu em yoh jubab hadooh katni leh.
Ka seiñ da pyntip ko wa heipor wa lai kylli ko chaphang ka RTI, ki wakreh da yait ki ki wei ym bien ki u e jubab katkam wa paan ha ka RTI.
“I da sñiawphylla i manda pyntip ki wa ym chem de ya ka RTI wei neini i daw ym ye u pyndep ya kani ka RTI wei da e daw ki wa u bru wa toh u pait ya kani ka RTI da chah kyrriah kaam u wei uwa dang wan thymme ym ye u leh iyi iyi leh heiyatoh wa kani ka RTI wei neiliang ka seiñ da pyrchang ko wow e biang ya kani ka RTI tangwa ym bien de won wow pdaing ya kani ka RTI,” da ong u General Secretary, u Sengbath Chambugong Marak.
Ka seiñ da pynbaad ko wa heipor wa u President ka AYWO ha Siju da lai u cha ka yungkrehkaam sorkar katkam wa da phah da ki heh ka seiñ na Tura da chah pynkhor u wei da maham ki wakreh wow ujor FIR pyrchah ya oo.
Deiwa beiñ ya ini i leh embor kani ka tnat sorkar, ka seiñ da e por ko 10 sngi wow jubab ya ka RTI wei lada ym leh ya ini ka seiñ daw pynman ko ya ka yakhih.
Ha ka RTI ka seiñ da paan ko ya ki Scheme wa da yoh na ka sorkar pyrdi kamjooh na ka sorkar jylla, ka poisa wa da yoh wa ya ki scheme wa da pynkrehkaam nadooh u snem 2010-11 wa u snem 2016-17 wa hadooh katwon wa da ye u pynkrehkaam ya kini ki scheme wa kiwi kiwi.
Discussion about this post