Ka Confederation of Meghalaya Social Organisation (CoMSO) da pyntip ko wa ha kani ka tayaw daw pynbna noh da ka yakhih wa eh, hadien wa ka sorkar India ym bna ko yei dawa wow pynkrehkaam ya ka Inner Line Permit ha ka jylla Meghalaya, wei i chah chet kylla hajrong i kular wow yachem wa u Amit Shah ya ki seiñbhalang.
U Chairman ka CoMSO, u Robertjune Kharjahrin da ong u wa lada ym ye u pynbait ya ini i kaam ye wow khai biang i chit ki paidbah iwa ye u ktah ya i suk i saaiñ ha ha ka jylla, neibhah kiwa boon ki khynroo dap ki dei chrai.
Da ong wa ki seiñbhalang ki sñiawthooh ki wa ym kwah wow mih i huri hura, khamtam neidaw wa ki paidbah da maad ki yei dooh na ka khlam COVID-19 ha u snem wa dep, tangwa i por da dawa neibhah wa em i pyrchang buhai chnong wa joor bha na Assam cha Meghalaya neibhah i long i man ha Assam kiwa em 1.3 klur ngut ki Muslim.
Da ong chooh chooh u wa lada ka sorkar ym e ko ya ka ILP, ka seiñ ym yohsa ki wow haap thooh ki laad wa ki luti kammon wow yada ya ka ri wa ka jaitbru wot lada haap wow poi u pood wow chim ya ka aiñ ha ka kti wow yakhun bar yow chah tlep ha ki poi wiar.
Ha i jooh i por uwa yahkhmat ka CoMSO da ong u wa ka seiñ da pynkhreh ko wow pynsakhiat ha u Amit Shah yei emkaam yong ka ILP ha ka jylla, tangwa da pynsñiaw yei sñiawsih yei leh ka sorkar India kawa pynyoo yei wym kheiñ yei angnood ka jylla.
U Kharjahrin da pynsñiaw u leh yei artatien ya ka sorkar jylla kawa da kular na i por cha i por wa da chimkhia ya kani ka kaam, wei da pynsñiaw u leh yei artatien yei wan u Montri Kaam Pohyung ka ri India, deiwa ong wa ini i leh da pynyoo ko yei wym kheiñ ya i rai yong ka Yung Dorbar ka jylla wa i angnood ki paidbah.
