Maham ka ECC wow lai chadooh cha Supreme Court

Ka Environment Co-Ordination Committee (ECC) da pynman ko ya ka yalang chong pyrkhat kaam wa jhan wa ki waheh chnong deiwa bood kyndon yada na u COVID-19 yong ka sorkar, deiwa pyntip leh cha ka yung krehkaam u DC, heiwa ya kani ka yalang da pynman ha ka Dorbar Hall yong ka chnong Latyrke, Elaka Sutnga ynne ka sngi ka 14 tarik.

Ha kani ka yalang da wan kamwa 18 ngut ki waheh chnong deilang wa ki Secretary chnong kiwa chah ktah kiwa haap hapoh yong ka Elaka Sutnga.

Neiliang ka ECC da pynsñiaw ko leh ya i lai luti yong ki kaam wa iwa da booddien cha ki yung krehkaam waphær waphær yong ka sorkar wei da pynsñiawthooh leh ya ki waheh chnong yei ktah yong ki karkhana Coke da ki bru wa chemphang (Expert).

Ki waheh chnong waroh da pynsñiaw ki yei sñiawdiaw ya i leh khlieh chrieh ka sorkar kawa kut wow pynbna du ha ki laad pathai kubor khlem da leh won iyi iyi leh wei i wym bna ka sorkar yei ood i yaam kiwa chong chnong.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ki waheh chong da pynsñiaw ki leh yei khyrngiat wow yoo wot hadien wa ka yung krehkaam yong u DC da pynmih ya ki hukum ha ka 15-07-2021 wa ha ka 02-08-2021 wow khang ya kini ki karkhana Coke tangwa da chem won wa kini ki karkhana Coke ym kheiñ ki iyi iyi ya kini ki hukum heiwa ki da thang wei pynmih tdem ki katwa ngait khlem salia.

Kamtæ ka ECC deilang wa ki Waheh Chnong wa ki Secretary chnong, da rai ki wow mih sa chisien cha ka yung krehkaam yong u DC wow yachem ha ka 16 tarik uni u bnai yow thooh yutip hajrong ini i kaam.

Ki waheh chnong da rai ki wow leh da iwa eh lyngba i yahkhmat ka ECC wow yakhun hadooh wa kut wei da yaklam wow leh da iwa eh lada ka sorkar ym ap ko yei ood ki paidbah.

Ki waheh chnong da sñiawsih ki wow tip wa u Montri Rangbah kam u khlieh ka sorkar da kyntait u wow yachem ya ka ECC wot hadien wa da dep booh ya i por yachem (Appointment) na i por cha i por. Ka ECC da ong ko wa ym sangeh ko ya kani ka kaam kawa bha hawa yatoh wa i ktah yei chait i khiah wa i ktah ya ka rymaw lada ka sorkar wa ka yung krehkaam u DC ym leh ki iyi iyi, wei daw yaleh hadooh wow poi cha ka High Court/Supreme Court.