Ka Environment Coordination Committee hadien wa da dep pynman yalang ha ka chnong Moolamylliang deilang wa ka Women`s Wing, ki Waheh Chnong wa kattu katni ki bru waheh yong ka thaaiñ Elaka Sutnga da maham ki wow tympiah tympra ya ki karkhana Coke lada ka sorkar ym chim ko yei kitkhlieh.
Ya ini da ong wa hadien wa ka ECC deilang wa ka Elaka da dep ki wow lai pait ya kini ki karkhana wei da chem wa waroh ki karkhana Coke tyngkheiñ ki ya ki kyndon wa da booh wei ini da pynchrai ko yei wym kheiñ bru ka sorkar ya ki khon ka Elaka.
Kamtæ da yakut wow pynmih paidbah biang ya ki khon yong ka Elaka lada ka sorkar ym ye ko u tympra ya kini ki karkhana kamwa da kular da u Montri Rangbah wow tympra lut ya ki 34 tylli kini ki karkhana Coke kiwa da kreh pyrchah ya ka aiñ. Tangwa lada ym leh kamwa da kular, ki khon yong ka Elaka daw lai ki wow tympiah tympra lut ya ki.
Heiyatoh wa ka karkhana Coke wa mantre da u Montri ka chnat PHE kawa tip kam ka Northeast Carbon Industries wa da chem katkam ka RTI kawa toh u em ha chnong Mynska, West Jaiñtia Hills District, tangwa da wan booh ya ka hapoh ka Elaka, da dawa wa toh u kyrriah noh chi syndon wei lada ym leh ya ini, ki khon yong ka Elaka daw leh ya iwa emkaam.
Heiyatoh won wa ki karkhana kiwa da biang ki kot ki sla, da pyntip wa ha ka 27-09-21, ka Elaka Sutnga deilang wa u Deputy Commissioner da chem wa kini waroh toh kiwa pynkrehkaam pyrchah ya ka aiñ nadooh i rukom thang yong ki, i jakhlia na kini ki karkhana Coke toh kiwa da noh roi khlem da bood ya ki kyndon yong ka Pollution Board wei da chem leh wa pynemkaam da ki khynnah wa dang khian wow pynkrehkaam pyrchah ya ka aiñ wei heijooh i por kini ki karkhana ym em ki ya ki tiar pynkhooid la-ær namo ki Filter kamwa da phah da ka sorkar wow booh yow yada ya ka rymaw wa ya kiwa chong chnong.
Hajrong ini da kyrpaad ya ka sorkar wow khang leh ya kini kiwa da biang ki kot ki sla. Wei heijooh i por neiliang u Deputy Commissioner da dep u wow kular hakhmat yong ki khon ka Elaka wow e da ka FIR ya kini ki karkhana Coke wei da ong u wa lada dang pynkrehkaam, daw phah kem lut ya ki neibhah ym chem wa bood ya ki kyndon yong ka aiñ, tangwa ka ECC da sñiawsih ko wa hadooh katni neiliang yong ka yung krehkaam u Deputy Commissioner ym leh ki iyi iyi leh. Wei ini da pyndooh ko yei chaniah ki khon ka Elaka ya ka sorkar hi waroh kawi.
