Ka Hynñiewtrep Integrated Territorial Organisation (HITO) da maham ko wow mih madan noh wow dawa ya jar jiar ka jylla neidaw wa leh chiliang ka sorkar hei wow pynkrehkaam ya ki Scheme.
U Donbok Dkhar da ong u wa ka HITO daw yachem ko wa ki khlieh synchaar wow dawa noh ya ka Khasi State wei wow yaklam leh ya ka Reservation Policy neidaw wa leh chiliang ki sorkar nadooh kiwa nachwa hadooh kiwa katni.
Da ong u wa ini i leh chiliang wei leh beinah ka sorkar man i ha i dur wa ki Nokma ym emkaam wow yoh sanat ki na ka District Council katwa ki Syiem wa ki Dolloi hap yoh ki ya ki sanat.
Neiliang ka HITO da paan pynche ko leh na u Montri Rangbah ka jylla hajrong i pynkrehkaam ya ka Pradhan Mantri Jan Vikas Karayakaram (PMJVK) kawa man ka Scheme yong ka sorkar pyrdi na ka chnat Minority Affairs, neibhah katkam ka RTI wa da yoh da chem wa ya kani ka Scheme da pynkrehkaam du ha West Garo Hills kawa da che wa ka sorkar kheiñ Meghalaya ko du ya ka West Garo Hills.
Ka HITO da pynsñiaw ko leh wa sa kawi tawon ka Scheme na ka Ministry of Tribal Affairs neibynta wow chna ya ka Tribal Research Institute da pynkrehkaam du ha West Garo Hills kawa kynjoh palat T.5 klur.
