Ka HNYF da maham ko ya ki damok wa emkti u tynyap ya kawi ka khynnah skur yong ka Wapung Secondary School kawa dang 16 snem i rta kawa na ka chnong Pamrakmai, East Jaiñtia Hills wa lada chem ya kiwon kiwon kiwa emkti u tynyap ya kani ka khynnah skur, ka seiñ daw pynchitom ko da ka aiñ yong ka hi.
Ka seiñ da ong ko wa i daw wa pynman wow chim ya ini i rai toh neidaw wa suki wei tlot ware ki bor yong ka aiñ khamtam wow yoh kem ya ki bru kiwa emkti ha ki kam pynyap, heiwa ynnin u snem da em i jooh wa jia ha chnong Sohkymphor iwa kattu la 3 bnai ym pu em u yoh kse iyi iyi leh wow kem ya kiwa emkti.
Kamtæ neiliang ka HNYF u sdang noh ko u booddien ya ini i jia wow thooh tre ya kini ki bru kiwa emkti wow tynyap ya kani ka khynnah skur, wei lada chem, daw pynkrehkaam da ka aiñ yong ka hi, neibhah wa ym myntoi u ekti cha ki bor yong ka aiñ hawa slem ki u krehkaam wei tlot ka aiñ wow e yada ya ki kynthai kynnah khamtam hei kaam slaitbor, kaam pynyap dusmon ya ki bru wa lui lui wa hok wa chida.
Da ong leh wa lada kamni tlot ka aiñ wei suki ki bor yong ka aiñ u krehkaam kattæ u nang joor u yohbor ki damok u leh yei kaam wa sih na ki sngi cha ki sngi, da pynrap leh deiwa kylli lada ka aiñ yada ko du ya ki damok wa khlanbor mo? Katwa ya kiwa chah lehbeiñ kiwa yap kiwa chemchitom, ki duk ki suk ym em aiñ mo wow yada ya ki? Kamtæ ka seiñ da ong ko wa ka aiñ toh u man salonsar ko ym toh u lai chilliang ko.
Ka kyrwoh na u General Secretary HNYF, Eastern Region u Damechwa Syrti.
