Ka HNYF Eastern Region da maham ko yaka seiñ kieñ suloi ka HPC-D (Hmar People Convention-Democratic) wow pyndam noh syndon yei dawa poisa kamwa T. 8 lak na ki paradoh parasnam Khasi-Pnar kiwa chong kiwa sah ha ka chnong Athukal, Cachar District kawa haap ha khappood Assam-Manipur khnang yow lait ki paradoh para snam u tieñ u lai khih lai khan man-ka-sngi.
Ka seiñ da ong ko wa katkam wa man katni, ki bru Khasi-Pnar yong i da hap ki u chong khop hapoh kawi ka yungmane neidaw wa tieñ ki, ka HNYF dawa ko leh na ka HPC-D wow wanrah ya i yasuk para jaitbru ri-loom kiwa chong wa sah ha kiwi ki bynta yong ka jylla North East khnang wow ye ki u wanrah ya i suk i saiñ para i, tangwa lada pteiñ ki u pynwit lane maham ya ki paradoh para snam yong i, ka HNYF ym yohsa ko wow hap pynhiar tput.
Ka HNYF ka burom ko yei yasuk para jaitbru ri-loom kiwa chong wa sah ha kiwi ki jylla ki wym em mantre ki, tangwa ha ki jylla wa mantre ki, ye ki wow yada kyrpang ya ki jaitbru yong ki kiwa mantre hanla katæ leh toh u burom ya kiwi wei u maya yi ki jaitbru Hmar kiwa chong wa sah ha ka Bri U Ynñiawtrep Ynñiaw Wasa yow im ki dei suk dei saiñ kiwa ym jooh em wa pynwit ya ki mynnu mynnu kamwa leh da ka HPC-D.
Kamtæ da kylli kammon kwah ki u pynwit ya ki jaitbru yong i, heiwa ya ki jaitbru Hmar kiwa im ha khyndaw ha chyiap yong i ki da yoh bhah kyrpang ki kamwa yoh i ki tre jylla kam ka bhah Ration Card, Job Card, Schedule Tribe, u thap Vote neidaw wa burom kylliang ya ki para ri-loom, hanpaya lada kamni i rukom man arsap ki daw baamdoh ki i ha kawi ka sngi cha thaw wa duna paaid ki bru yong i, pynwit pyntieñ ki, leh heh ki kutjait, ha thaw yong i won pynyoo ki yei man jai jai wa arsap ki.
Da ong leh wa katkam wa pynbaad, da em ki dkhot yong ka HPC-D wa chah kem ha ki pulit ka Assam neidaw wa khana ki ya ki pulit i wym ye u pdiang neibhah wa boi em kiwi ki jaitbru wa khanna ya i thaw sah ki neibhah ha kini ki bnai wa da dep dang em i kajia pood hapyrdi ka Assam wa Mizoram, boi na ini i daw sñiaw chrai kiwi ki jaitbru tæ khanna ki ya ki pulit, ka HNYF dawa ko leh ya ka HPC-D wym hoi u suba kulmar eh ki khlem ka yutip wa tikna. Ka HNYF dawa ko u wow wan i suk ha kini ki thaw khnang wow lait ko u poi cha u pood u yaphær jaitbru.
Ka kyrwoh na u General Secretary, HNYF Eastern Region u Damechwa Syrti.
