Ha ka 30-04-2021 heipor kamwa 11:00 waje i step, ka seiñ Hynñiewtrep Youth Council (HYC) Narpuh Circle hapoh i yahkhmat u Publicity Secretary ka seiñ u pyndap Syiemlieh deilang wa ki kattu katni ngut ki dkhot, da lai hiar ki cha ki dukan nadooh Mynkre ter ter chadooh cha Umsahi Lumshnong yow pyntip ya ki wa ym toh wow chim kabu lane u dai syad ya ki mar ki mata khamtam ki marbam kamwa da booh ya i dor ha kam kini ki por wa joor ka khlam COVID-19.
Ka seiñ da ong ko wa lada dai syad, daw ktah ko ya warohlang wei ym em wa dooh lane wa mahajon.
Ka seiñ da chem ko leh wa em kiwa chim kabu ya i dor, kamtæ ka seiñ da lai ko wow maham joor wa lada chem næ tip wa dang chim kabu, ka seiñ daw leh ko ya iwa emkaam.
Ka seiñ da e khublei ko leh ya ki waheh chnong ka Mynkre wa u Waheh Chnong ka Chiehruphi kiwa da smat wow kyrchaan ya ka seiñ neibynta i bha i miat yong ki paidbah hi hapoh ka thaiñ. Kamtæ ka seiñ hi da kyntu ko ya ki paidbah wa lada chem ya ki dukan wa chim palat ya i dor wow sñiawbha u pyntip cha ka seiñ, pynkut ka kyrwoh na u P. Syiemlieh.
