Ka seiñ Hynñiewtrep Youth Council (HYC) ynne ka sngi da dawa ko na ka sorkar wow thung da ka dhab wow thooh bniah hajrong i maa wa mih nei lait ka la’ær bih na ki top pynlang jhep Uranium ha Nongbah Jynrin, South West Khasi Hills deiwa dawa leh wa ka sorkar emkaam ko wow kset noh ya kini ki thlu neibynta i chait i khiah ki paidbah ka thaaiñ.
Ki dkhot ka HYC hapoh i yahkhmat u President ka seiñ, u Robertjune Kharjahrin ha i yachem wa u montri ka chnat Forest and Environment, u James K Sangma da dawa ki wa ym pdiang weiwa ym chaniah ki lada kiwa tih bniah toh na ka UCIL deiwa pynrap leh wa ym myntoi ya ka sorkar u phah ko da ki Magistrate namo ki pulit neibhah ym tip ki yei man i long nei lait kani ka la’ær bih.
Hawa yaklam wa kiwa pathai khubor hadien i yachem wa u James, u Kahrjahrin da ong u wa katkam wa chem ki dkhot ka seiñ na ka Umdohlun, da yoo sakhiat ko ya ar tylli ki top pynlang jhep Uranium hajrong ki 4 tylli ki thaw tlep jhep kiwa da kaad da piah deiwa ong leh wa hapoh i yahkhmat u Montri ka Nongbah Jynrin da chem wa na kitai ki top da em leh ki chram ki kynroh kiwa da oor wei ini da wanrah i yei ku syndet i em ka la’ær bih wa lait na kini ki thaw wei ye ko leh u poi wot chadooh cha Nongstoin, Mawkyrwat neibhah wa jngai ki du kamwa 20 Km donhi na kani ka thaw.
Da ong u leh wa katkam ka yutip wa yoh ka HYC, da em hadooh 7 tylli ki top pynlang jhep Uranium ha Nongbah Jynrin, wei neiliang ka seiñ da dawa ko wow phah chna wei wow phah kset biang ya kini ki thlu wei kaad ki kynroh ki chram waroh kiwa em ha kini ki top.
Heijooh i por da ong u wa neiliang u James da kular u wow chimkhia yeini dei wow rah yaklam yeini ha ka dhab ki montri ka sorkar jylla neibhah wa man ko ka phang wa ktah yei yap i im ki paidbah.
Da ong u leh wa lada ka sorkar ym mano ko yeini, neiliang ka HYC daw thoh ko cha ka Ministry of Forest and Environment ka sorkar pyrdi wei lada emkaam daw ujor ko leh wot cha ka National Green Tribunal (NGT) wow leh yeiwa emkaam.
