Ka Dorbar Chnong Tympang Iawmusiang ynne i step da lai yachem ko ya u DC ka West Jaiñtia Hills District yow pynsñiaw yei sñiawkhia hajrong i maa wa da mih lym kit yei jhep wa da lang la palat ar bnai ha Iawmusiang iwa da ktah chiboon ya kiwa chong chnong, kiwa lai yaw, kiwa chong dukan, kiwa kamai kari, ki khynnah skur kamjooh ya ki paidbah waroh wa lai luti na kini ki bynta wa em i jhep lada ym kit de yei jhep.
Da ong wa ini i jhep da ktah ko yei chait i khiah ki bru hadooh ki wakreh pyn ha yung krehkaam u DC kamjooh ka yung bichaar District & Session Judge.
Ka Dorbar Chnong da ong ko leh wa neidaw wym em wan kit yei jhep na ki yung ki sem ki bru, da pynbor ya ki wow wan noh yei jhep ha Iawmusiang wei ym ye sñiawthooh de yei wym ye de u pynbait ya ini i kaam wei ha ki por wa nachwa da ye wow pynbait tangwa du kattu katni por donhi.
Da ong leh wa sñiawthooh hi yei chitom wow pynyoh yei thaw noh jhep tangwa toh u pyrkhat leh yei maa wa dang yang deiwa dang em hi ka khlam COVID-19 wei ym toh u e laad wa ini i jhep u pynjoor i yei chitom ki bru. Wei ym toh leh wow e laad ya kiwa kwah u chim kabu wow pynman Politics yeini i kaam wei toh i kaamram ki bor District wow leh yeiwa emkaam yow lait na waroh i jait i maa wa mih na ini i jhep.
Kamtæ da e por 3 sngi wow kit yeini i jhep, wei katwa ym pu yoh yei thaw wa thymme toh u li noh cha i thaw noh jhep wa em ha Mynkjai neibhah wym jooh em ktah i yei chait i khiah yong kiwon kiwon da ki phaw snem nachwa hawa noh yei jhep ha ini i thaw neidaw wa jngai i na ki chnong ki thaw.
Ka Dorbar Chnong da ong ko leh wa daw yang ki hadooh mynstep wa daw chong bichaar ya kani ka mukotduma da ka High Court ka Meghalaya wei lada ym em laad wow kit yei jhep, neiliang ka Dorbar Chnong da maham ko wow pynman noh dei khang chnong.
