Ka Joint Action Committee (JAC) wa kynthup ya ki waheh chnong ka thaaiñ War Jaiñtia waka Hynniewtrep Youth Council (HYC) War Jaiñtia, daw ujor ki cha ka Meghalaya High Court pyrchah ya ka Dhar Company hajrong i pynbaad wa da pynkreh khalær ya ka sarokbah NH40(E) kawa da khut thymme ka NH-206 na Dawki-Amlarem-Jowai.
Hawa klam wa kiwa thoh khubor, u Chairman ka JAC u Yoodahunki Shylla da ong u wa katkam ka RTI wa da yoh, ka Dhar Company toh kawa chna ya uni u sarok yow pynskem ya i bynta wa jrong 16 Km ha u snem 2021-22 nadooh na Nongtalang cha Dawki hei mang tangka wa Rs. 43.70 klur.
Tangwa u Yoodahunki da pynbaad u wa uni u sarok du hapoh ar bnai da sih noh u neidaw wa chna habra da u Contractor.
U Yoodahunki da pynbaad u wa i chna toh iwa da leh tangdep neibha da chna hei lut wa Rs. 43 klur wei kammon u sih u sarok hapoh ar bnai. Kamtæ da beiñ joor yeini i rukom kreh u Contractor wei kamjooh ka yung krehkaam wei hajrong ini, ka JAC da pynkhreh ko wow lai tied ya ka dwar ka High Court yow dawa yei hok ki paidbah.
Da dawa leh wa u Chief Engineer ka PWD wa toh u e u yei pynche hapoh chi tayaaw hajrong ini i chna ya uni u sarok lada u Contractor bood u namo ym em katkam ki kyndon wa da phah wei da dawa leh wa ka sorkar toh u e ko ya ka dak yong namo wow Blacklist ya kam kini ki Company wa chna khaler.
Discussion about this post