Ynne ka sngi ka Jaiñtia National Council (JNC)- Sumer Circle hapoh i yahkhmat u President, u Sakilan Chyrmang da maham joor ki ya ki kari wa kit palatpood wow lai na kani ka yngkieñ nar kawa em ha wah Ri Manar ha chnong Samasi, Elaka Sumer, East Jaiñtia Hills neibhah wa kani ka yingkieñ em ko kattæ heipyrdi wa tlot bha heiwa ki Screw ki Bolt ym em de man ki kiwa skem wei ki nar leh da sap sarah lut ki.
Da ong leh wa kani ka yingkieñ sñiawma wa ka’an ko hawa lai kari iwa da booh hei maa ya ki bru wa lai wa wan.
Ka seiñ neipor cheipor pynkynmoo ko wa wym hoi de wow lai na kani ka yingkieñ da ki kari wa khia hadooh 40-50 Ton wei wot ka sorkar leh da booh kyndon ko wa hoi u lai du kiwa kit dei wym tam 9 Ton wei yeini leh da thoh ha ka Signboard wa da booh ha rood kani ka yingkieñ tangwa ym em wa ap yeini khamtam ki malik kiwa kwah myntoi du ya idæ iwa ye u wanrah yei dooh nong wa khroo ya kiwa chong chnong ka thaaiñ lada dooh noh ya kani ka yingkieñ.
Ka seiñ da ong ko leh wym yohsa wow khang noh chisiendon ya ki kari wa kit palatpood wei kyrpaad leh ya kiwa chong chnong wow ya krehlang wa lada chem ya uwon uwon wa leh tam toh u ksoh wei wow leh deiwa khor, da ong u President ka Circle.
Chooh chooh u Sakilan da ong u wa ka seiñ hi nachwa da dep phah ko leh dei thoh cha ki Engineer ka PWD wa cha ki bor wa toh u pait wow pynchna (Repair) noh ya kani ka yingkieñ tangwa i sñiawsih toh hadooh katni ym em wa ap, neibhah i rta kani ka yingkieñ toh du hapoh 20 snem tangwa kattu da duna 40 snem ym em wa pait ka.
Discussion about this post