Jowai: Ka Khasi Students’ Union – Jaiñtia Hills District (KSU-JHD) da pynrem joor ko ya ki pulit ka Ri-Bhoi District neidaw wa choh wa bom khiar ki ya ki dkhot ka seiñ.
Ini i leh ki pulit pynyoo wa dang man bru khloo kiwa ksoh ya ka aiñ wei u kem kamjooh wow pynngat ya ki dkhot ka seiñ ha ki kyndon aiñ waphær waphær toh kam wow e diñ chooh chooh ya ini i kaam.
Toh du neidaw wym neh chah de yei leh embor ka Company kawa kreh yabor ya ka luti rel ha Byrnihat khlem da yoh ya ka NOC na ka KHADC wei wym pu ye ka sorkar u Mukul wow wanrah ya ki aiñ wow pait yei psiah i mih ki baar jylla, ki dkhot ka seiñ da hiar syndet cha i thaw wa kreh ka tai ka Company.
Hadien wa da dep ka KSU wa ki paidbah u pynsñiaw ki yei pyrchah ya ka luti rel, katai ka Company won da lai bait ko cha khmat yei kreh.
“I chah hiar thma ha katu ka sngi toh iwa sdang donhi. Lada kwah phi ya i chongsuk hapoh ka jylla, sñiawbha pyllait noh ya ki dkhot ka seiñ khlem pynngat ha kiwon kiwon ki kyndon wei wow pynsangeh noh yei chna luti rel. Lada ym kamtæ toh u pynkhreh wow mad ya ka yakhih kawa ye u sdang ha iwon iwon i bynta” da ong ka seiñ.
“I toh ki jaitbru wa du chitroh donhi wei lada elaad wow poi ka luti rel, daw chah tlep i ha ki baar jylla wei daw chah beh i, chah knieh i kyndaw i chyiap, i yoh i kot wa ka kahyi pateiñ kamtæ ym e laad wow poi ka luti rel hapoh ka jylla yong i.”
“Lada ka sorkar kwah ko yei chongsuk chongsaiñ toh u pynsangeh ko ya katai ka Company wow pteiñ ko yei kreh neibhah ka seiñ ym pyrchah de ko da i ktien daw leh bait ko da i kaam.”
Ini waroh toh katkam kakhubor wa phah da u Ohibait Dkhar President, KSU-JHD.
Discussion about this post