Maham ka KSU wa ka NESO wow yakhih lada pynman aiñ yabor ya ka Citizenship (Amendment), Bill 2016

Shillong: Kam ka yachimbynta lang wa ki seiñ ki khynnah puræ ka thaiñ mihsngi wow pyrchah ya i thmu ka sorkar India wow pynkylla ya ka aiñ wow man tre ri, ka Citizenship (Amendment), Bill 2016 ya kiwa khian paaid na ka ri Afghanistan, Pakistan wa Bangladesh, ka Khasi Students’ Union (KSU) deilang wa ka North East Students’ Organisation (NESO) da pynman ki yei pyrchah deiwa thang ya kani ka Bill ynne ka sngi ha khmat u mot u Kiang Nangbah wa em hajan ka Civil Hospital Shillong.

Ha kani ka sngi da yoh i klam na kiwa kitkaam kini ki ar tylli ki seiñ, kitæ toh na u President ka KSU, u Lambokstarwell Marngar wa na u Chairman ka NESO, u Samuel Jyrwa kiwa da pynsñaw yei ma lada pynman aiñ ya ka Citizenship (Amendment), Bill 2016. Ya ka yalang ha kani ka thaw daw pynlai da u General Secretary ka KSU, u Donald Thabah wei da wan chim bynta da ki dkhot kiwa da wan na kylleiñ ki bynta ka Khasi-Jaiñtia.

Hawa klam ha kani ka sngi u President ka KSU, u Marngar da ong u wa hanlada ka sorkar jylla da pyrchah ko ya ini i thmu ka sorkar pyrdi, tangwa ympu em phah ko ya ka yurim wa ki daw wa pyrchah cha ka sorkar pyrdi.

U President ka KSU da maham u wa ka seiñ daw pynman ko i yakhih wa khor lada ka sorkar India pynman aiñ yabor ko ya kani ka Bill, wei lada mih iwon iwon i jia wa sñiawsih ka sorkar na Delhi haap bahkhlieh ko yeitæ. Da ong u wa ka sorkar toh u pyndam ko yeini i thmu yong ka wow yada ya ki khian paaid ha waroh ka thaiñ mihsngi.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Da ong u wa ini daw ktah ko ya ki jaitbru khian paaid ki jylla ka thaiñ mihsngi waroh kawi wei daw poi i por wow wiar jait ki neibhah da ki phaw lak ki Hindu daw wan tlep ki ya ka thaiñ waroh kawi.

Neiliang u Chairman ka NESO, u Samuel Jyrwa da ong u wa lada e laad ya kani ka Bill wow pynkrehkaam hapoh ka jylla, nyngkong daw ktah ko ya ka Meghalaya kawa em u pood wa jrong kamwa 450 km wa ka Bangladesh, neibhah ha kani ka ri ki Hindu em ki hadooh 1.33 klur wei lada du chiteiñ na kini u wan ki cha kani ka jylla, ka jaitbru kammon u man ko neibhah ka jylla em ko du kamwa 35 lak ki tre jylla.

Da ong u wa ka NESO nadooh u snem 2016 da pyrchah ko ya kani ka Bill hakhmat ka Joint Parliamentary Committee (JPC) kawa pait ya kani ka Bill wei da dawa leh wa ka sorkar India toh u yada kyrpang ko ya ki jaitnru khian paaid.

Da ong u leh wa lada pynman aiñ ka sorkar India ya kani ka Bill pynyoo wa  thmu ko u thombor ya ki khian paaid, wei emkaam wow yieñ pyrchah wow yakhih wow yada ya ka jaitbru khian paaid.