Ka KSU West Jaiñtia Hills District Unit da beiñ joor ko ya ki jaitbru Karbi kiwa da lai pyndik wei maham ya ki Pnar wa em wa sah ha thaaiñ Block-I, wei neiliang ka seiñ da maham ko ya ki jaitbru Karbi wow sangeh noh u pyndik ya ki jaitbru yong i wa em ha katai ka thaaiñ.
U President ka KSU West Jaiñtia Hills, u Laitphar Syngkrem da ong u wa lada ki Karbi u pteiñ ki u maham wei wow pyntieñ ya ki paradoh parasnaam kiwa sah ha ka thaaiñ Block-I, neiliang ka KSU ym ye ko wow suki wow pait hi-eh, wei ka seiñ daw leh ko yei kaamram wow chim yei bahkhlieh ya ki paradoh para snaam ha iwon iwon i bynta.
U Secretary ka KSU WJHD, u Lenning Grad Tariang da ong u wa kiwa boon hi kiwa pyndik ya kiwa chong chnong toh ha ki pulit ka Assam kiwa booh ktem ha katai ka thaaiñ, wei ki bru yong i wa sah ha kitai ki thaw hawa ah phlang næ dieñ, kit moo næ chyiap wow chna yung da hap ki wow su dan cha ki pulit Assam.
Najrong wot ki jhoor lane u kba uwa kit ki na loom leh hap wow su dan cha ki pulit wei wot hawa lai yaaw lai haat leh hap wow su kamwa T. 300-400 kam ka bai lai luti cha ki pulit Assam, wei ki paaid yong i da chah pyndik ki leh hawa lai chimbynta ha kiwon kiwon ki yalang.
Neiliang uwa yahkhmat ka KSU da kyntu u ya ka sorkar jylla wow pait bha ya kam kini ki chah pyndik, heiwa da ong wa ha Block-I da em 36 tylli ki chnong ki Pnar wei i chah pynthut toh neidaw wa kwah ki Karbi u pynheh ya u pood u ang yong ki khamtam hawa ki dang dawa ki ya ka jylla yong ki hi.
Hawa kylli, u Lenning da ong u wa ki pulit Meghalaya da em ki rap chaneiñ na ini i thaw wei ym jooh hiar ki cha kitai ki chnong, wei da kyrpaad u ya ka sorkar Meghalaya wow phah sonteri ha ki pulit wow e yei yada ya ki jaitbru yong i, khamtam hawa ki Karbi jooh pynsih pynpra ki yeiwa thung wa tep ki Pnar wei da thang ki leh ya ki thaw rep yong ki.
