Ka KSU War Jaiñtia Circle ha ka 30 tarik u bnai wa dep da khut yalang ko ya ki waheh chnong ka thaaiñ War Jaiñtia wa ya Ka Synjuk ki Rangbah Shnong War Jaiñtia wow pynche pynsñiawthooh hajrong i pyrchah ya ka CAA wei wow pynkrehkaam noh ya ka ILP hapoh ka jylla.
Ha kani ka yalang da emlang u President ka seiñ u Lambokstarwell Marngar ryngkat wa u Sonstar Nongkhlaw u Assistant Finance Secretary, u Leningrad Tariang u Organising Secretary KSU JHDU wa neiliang ka Synjuk ki Rangbah Shnong War Jaiñtia da wan chimbynta da u President u Daniel Khongsit, wa kiwi kiwi. Haka yalang neiliang ka Synjuk da chim ko ya ka rai wow kyrchaan yei dawa ka KSU.
Neiliang u President ka KSU da kyntu joor u ya kiwa kitkaam chnong wow man ki kiwa paitsiar neibhah ini i wym mano ka sorkar pyrdi wow pynkrehkaam ya ka ILP hapoh ka jylla daw pynbor ko ya ka seiñ wow pynkrehkaam noh da ka ILP ka yong ka hi.
Neiliang u Daniel khongsit da ong u wa neini chaphrang ym toh de wow e ya ka Residential Certificate ya ki baar jylla deiwa maham leh wa emkaam u paitsiar yei psiah i mih ki baar jylla wei khamtam ha i chongkha chongman.
Ya kani ka yalang da pynlai da u Aurora B Pamksang, Assistant General Secretary ka KSU War Jaiñtia Circle wei da yoh leh yei klam na u Laitphar Syngkrem, u Leningrad Tariang, u Sonstar Nongkhlaw wa kiwi kiwi.
