Ki chnat krehkaam yong ka Khasi Students’ Union (KSU) kiwa em ha sor Shillong wa khapsor ha ka 11 tarik uni u bnai da lai phah khang wei pynsangeh krehkaam ya kiwa boon ki yung krehkaam kiwa em ha Shillong neidaw wym burom ki ya ka sngi chuti wa da e yei leh ñiam leh rukom kawa chisien chi snem yong ka Hima Khyrim kawa tip kam ka Shad Pomblang.
Ini i phah pynsangeh krehkaam da leh ya kitu kiwa wai yung krehkaam wa kynthup ya ki Bank, ki Post Office, ki yung krehkaam ki Company kiwa em nadooh ki thaaiñ Lumdiengjri, Motphran ter ter chadooh ki thaaiñ Khyndai Lad, Laitumkhrah, Nongthymmai wa kiwi kiwi leh ki dong ki chnong.
Ka seiñ da ong ko wa ini pynyoo wa kini ki yung krehkaam ym em burom ki wot hadien wa ka sorkar da dep ko wow pynbna chuti wei man ko leh i yoobeiñ yei man kyrpang ka jaitbru.
Ka KSU da ong ko wa na ini i daw da maham deiwa eh ya waroh ki yung krehkaam neini chakhmat hawa em ki sngi kyrpang yong ka jaitbru kam ka lyngkhooh sngi yap u Tirot sing, Kiang Nangbah, SoSo Tham, Shad Suk Mynsiem, Sengkut Snem, Behdieñkhlam wa toh u kynmoo ki thij wym toh u yang hadooh wa ki dkhot ka seiñ u wan phah khang ki.
Wei lada ym tip wow burom itæ mut wa ym em yumut wow wan wai yung krehkaam ha ki thaw yong i.
Neiliang yong ka seiñ da kyntu ko ya ki bor wa toh u pait wa i rukom pynbna chuti u man ko iwa salonsar ya waroh ki chnat chakri paidbah kam ki Bank, ki yung krehkaam ka sorkar pyrdi wa cha ki Company wa em hapoh ka jylla, ki thaw puræ puthi khnang wym booh ya ki paidbah hei wym sñiawthooh neibhah toh ka chuti yong ka District waroh kawi.
