Ka KSU South West Khasi Hills District da maham joor ko ya waroh ki Contractor næ kiwa e kaam, kiwa wanrah wakreh na baar jylla khlem em yaka Work Permit. Ya ini i da leh ka seiñ hadien wa chem ha iwa boon ki khynra wa da leh hapoh ka District wa boon ki wakreh toh ki wym em kot em sla kiwa nadooh kiwa neiwon lane kiwa wan neiwon.
Ka seiñ da ong ko leh wa em i leh stiñ ki bru sorkar kamjooh ki Labour Inspector wow pyntikna, wow pait u sylli yaki kot ki sla yong ki bru iwa da pynman yaka seiñ wow leh da ka ya ini hadooh wow beh ya ki bru wym biang ki kot ki sla.
Chooh chooh da ong wa ki Labour Inspector wa da dep thung hapoh Mawkyrwat Block, Mawsynram Block wa Ranikor Block hap ki wow pyndep yeiwa da pynkit ha ki. Da dawa leh yaka District Level Team wa khlieh da ki Deputy Commissioner wa ki Labour Inspector wow lai pait ki man-i-por khamtam ha ki thaw khappood kam ha Ryngku, Hat Mawdon, Borsora, Nongjri wa kiwi kiwi khnang wa ym em i wan psiah tooh iwa hadien daw yohlaad wow man kam ki tre chnong wei yow psiah pyrtuid hapoh ka Electoral Roll.
Ka seiñ da kyntu ko leh yaki Contractor wow e kreh chwa ya ki tre chnong lait noh ki kaam wym ye ki wow leh da ki kamjooh leh kiwa chong chnong wow pait bnia ki ya kani ka kaam wei yaki pulit wym toh u pyndik ki yaki dkhot ka seiñ.
