Ka Dorbar Chnong Lumputhoi, Elaka Rymbai, East Jaiñtia Hills District dap ko dei sñiawkhia wa hei pyrdi synyaw ka 21 tarik hei por 12:00 waje da em ki bru wym tipmit kamwa 4 ngut kiwa na palat chnong da wan pynawri pynawra ki deiwa tem sur wei klam sih klam khlem akor hapoh ka chnong ka thaw iwa da pynwit pynthut yei thiah yei dem yong ki paidbah wa chong chnong.
Kamtæ ka Dorbar Chnong da beiñ joor ko ya kam kitai ki bru wa leh khlem akor deiwa chim kabu ya kani ka por lehkmen Christmas. Chooh chooh da pyrchang ki leh wow tooh ya ki syiar ki blang wa psan wa ri kiwa chong chnong, tangwa ym em yoh ki u rah neidaw wa em ki paidbah tre chnong wa khai wa kyriaw, kamtæ da yohlaad ki u yut.
Ka Dorbar Chnong da maham joor ko ya kiwon kiwon ki bru lada u tre chnong næ palat chnong kiwa wan pynmih kulmar hapoh u pood u ang yong ka chnong wa daw pynchitom ya ki katkam ka aiñ chnong.
Kiwa kitkam yong ka VDP leh da beiñ joor wei da maham ko ya kini ki bru wa chim kabu hei por miet por synyaaw. Da rai ki leh wow chim ya ka kaamram wow yang miet pait miet khnang yoh u chem ya ki wei yow pynchitom ya ki katkam ka aiñ.
Ka Dorbar Chnong da kyrpaad ko ya ka chnat pulit khamtam ka Police Outpost wow sñiawbha ki u e yei yakrehlang deiwa smat ki u jubab hawa em wa Phone ha ki por wa emkaam ya ki khnang yow ye u wanrah yei chongsuk chongsaiñ, ka imlang sahlang hapoh ka chnong ka thaw.
Ka khubor na u General Secretary Chnong Lumputhoi, u Shimphang Lyngdoh uwa man leh u President yong ka VDP.
