Ka Russia da ong ko wa ye ko u siat ya ki ri wa wan e tiar yaleh thma ya ka Ukraine deiwa maham khamtam ya ka USA deiwa ong wa ka da yahkhmat ko ya kiwi ki ri wow e yarap tiar yaleh thma iwa man leh iwa maa bha ini wa leh ki wei kini kiwa leh yeini daw chah siat ki, da ong u Russian Deputy Foreign Minister, u Sergei Ryabkov ynnin ka sngi.
Da ong u leh i e ya ki tiar yaleh thma wa ye u siat ya ki Tank kamjooh yow yada yei suiñ wa kiwi daw wanrah ko yei su kylliang da ka Russia.
Kam wow pynkynmoo wa u Ukraine President, u Volodymyr Zelenskyy hawa tyrwa yarap ki ri ya oo wow yut napoh ka ri, da kyntait u deiwa paan yarap da ki tiar yaleh thma.
Neiliang ka USA deilang waka NATO da phah tiar ki kam ki Shoulder Fired Missiles kiwa ye u siat du samen bru wa ki tiar siat ya ki lieñsuiñ wa tip kam ki Man-Portable Air Defence Systems (MANPADS).
Da kini ki tiar waroh da ye wow siat boon tylli ki Tank ka Russia tangwa iwa pynkuslai leh heijooh i por ya ka USA toh wa kini ki tiar yei ki u poi cha ki kti ki bru wym toh u yoh wei ye ki wow pynemkaam bakla ya ki.
