Jowai: Ka seiñ All Jaiñtia Poultry Trader Associations (AJPTA) kawa man kawi naka seiñ kiwa dai wa kiwa khayi (Supply) syiar napoh ri-loom Jaiñtia da booh ko ya i maham joor yaki baar jylla kiwa wan dai syiar Broiler wa kiwi kiwi wa Supply syiar chapoh u pood u ang yong ka ri-loom Jaiñtia.
Ka seiñ da ong ko wa ki baar jylla kiwa wan dai kiwa wan nadooh West Bengal, Assam wa na kiwi kiwi ki jylla wei kamjooh ya kiwa ym biang ki kot ki sla kiwa biang kiwa psiah pyrchah yaka aiñ wow dai leh pyrchah yaka aiñ, da knieh noh ki yaka kamai kajih yong ki tre chnong wa yaka hok yong ki neidaw wa boon ki bru yong i kiwa im wow pyndap pynbiang hayung hasem na kani ka kaam, tangwa da i wan dai syiar ki baar jylla pyn da ki hi daw ktah ko yaka yohnong yong kiwa dai wei wow Supply haki District yong i hadooh wa ym lai bait de ka kamai kajih ki tre jylla, wei kawa ma chooh chooh toh wa ki baar jylla ye ki wow knieh lut ya kani ka kaam ha kawi ka sngi.
Kamtæ neiliang ka seiñ da maham ko leh yaki tre chnong wa ym toh u pynchong dai syiar næ wow Supply syiar chapoh u pood u ang ka ri-loom Jaiñtia da u baar jylla hanlada em ki ya ki kot ki sla kam ki Labour License næ kiwi kiwi.
Neiliang ka seiñ da maham ko leh ya kiwa leh ya ki kaam Benami wow pynchah pyrtuid yow baam suk ki baar jylla.
Ka seiñ da khut da wer ko ya waroh nadooh kiwa dai wa kiwa Supply Wholesale syiar hapoh u pood u ang ka ri-loom Jaiñtia wow ya krehlang waka seiñ khnang yow lait na i chah knieh ka kamai yong ki.
Ini toh katkam wa pyntip u General Secretary ka seiñ u KS Rymbai.
Discussion about this post