Ka seiñ All Assam United Motor Transport Association (AAUMTA) da maham ko wow khang yei psiah ki kari kamai, ki kari wa kit ya ki mar wa emkaam kiwa na Assam cha Meghalaya hadien wa da pynman yakhih ka All Khasi Meghalaya Tourist Taxi Association (AKMTTA) yow dawa na ka sorkar wow khang ya ki kari kamai ka Assam wa kit ya kiwa uiñke suwari.
Ka AAUMTA da ong ko wa ki kari ka Assam toh kiwa em ya ka Permit Assam-Meghalaya-Arunachal Pradesh wei em leh kiwa em ya ka All India Tourist Permit. Kamtæ da ong wa em hok ki wow kit ya kiwa uiñke suwari cha Meghalaya wei ym ye wow khang yeini.
Chooh chooh da ong wa daw pait bniah bha ki yeini waroh neibynta i chngaaiñ i lai i wan ki kari kiwa na Assam kamjooh ya kiwa yah kari wa kiwa uiñke suwari kiwa wan cha Meghalaya wei lada jia iyi iyi daw ye u poi chei wym sñiawsuk.
Ym du ini da ong ki leh wa ye u chah ktah i lai kit bru ki kari na Meghalaya na Guwahati Airport kamjooh na Railway Station wei ini daw wanrah ko yei duna i wan kiwa uiñke suwari cha Meghalaya iwa daw ktah leh ya kitu kiwa im ja nei dai baam, ki Hotel wa kiwi de.
Da ong ki leh wa i khih i khan na ki kaam uiñke suwari ym em man ko da ya ka AKMTTA, kawa da kwah wow pynhiar yei uiñke suwari neibhah toh u sñiawthooh ki wa emkaam wow kreh chitom ymtoh wow suk ka kamai kajih yong ki kattu katni deiwa ktah won leh ya kiwi won ha Meghalaya.
Da khana ki leh wa da em boon kiwa da dam u lai cha Meghalaya neidaw wa em ini waroh wei da lai noh ki cha Arunachal Pradesh wei lada pteiñ kamni daw man kam heitu i por ka khlam COVID.
Ka seiñ AAUMTA da phah ko leh da ka dorkhat hajrong ini cha u Montri Rangbah ka Meghalaya, u Conrad K Sangma.
Discussion about this post