Jowai : Ka Village Defence Party (VDP) yong ka chnong Kyndong Tuber West Jaintia Hills District, ha ka khubor kawa da pyllait da u ma Iaipyndap B. Shylla u wa man kam u General Secretary yong ka VDP, da pyntip u wa da khang pyrchah ya kiwon kiwon ki bru ki wa man kam ki tre chnong ne ki bar chnong wa ym chah u pynyieñ kari kulmar ki hapoh u pood u ang yong ka chnong ka thaw næ wow leh ya kiwon kiwon ki kaam sih.
Ka VDP yong ka chnong Kyndong Tuber ha ka yalang kawa da pynman ha ka 07-12-2015 da rai u khang pyrchah ya ki bru kiwa pynyieñ kari kulmar ne kiwa chongke khamtam ha ki thaw wa doom wa lynggoh ha i por miet kiwa kynthup ya ki kari kamai ne ki kari samen, kiwa leh ya ki kaam sih kam dih kyiad dih Drugs wa kiwi ki kaam sih nadooh i thaw wa tip kam ka Riat Iajaw hadooh tre Chnong Kyndongtuber i thaw wa khut Saphoh.
U surok wa lai lyngba ka chnong Kyndong Tuber hadooh chnong Mynsoo wa kamjooh leh ya u surok u wa lai cha ka chnong Pammanik wa cha ka chnong Nangbah nadooh ka wah Myntwa hadooh ka madan Luti Raliang yong ka chnong neidaw wa boonsien ha kini ki thaw jooh mih ki kulmar ki wa pyntieñ yei lai i wan yong ki nongchong chnong.
Seiwi leh ka VDP yong ka chnong da maham ko leh wa ym hoi u pynher smat ya ki kari hapoh u surok ka chnong ka thaw neidaw ye i u wanrah ya i ma wa khroo ya ki nongchong chnong wa ym hoi leh u pynheh sur hapoh kari kamjooh u sangeh kari kulmar ha pyrdi surok ha i por thap næ pynhiar ya ki bru næ ki mar ki mata.
Nei liang ka VDP da kyrpad ko ya ki nongchong chnong wa ya ki paidbah wa lai wa wan wow yakrehlang ki nei bynta i suk ka imlang sahlang ka chnong ka thaw. Lada chem ya kiwon kiwon ki wa leh pyrchah ya kini ki kyndon, ka VDP daw pynchitom ko ya ki kat kam ki adong krehkaam ka chnong.
Discussion about this post