Jowai: Ka chnong Thangskai da pynsñiaw ko yei sñiawdiaw hajrong i wym bna wa i lai lait ka Dalmia Cement Ltd. ka karkhana pynmih khyndaw-bilat wa em ha ka chnong Thangskai, East Jaiñtia Hills District.
Ka chnong da pyntip ko wa yaka soskular wa da ya soi waka Adhunik Cement Ltd., ha u snem 2006 ha i por wa dang tip ya kani ka karkhana kam ka Adhunik Cement Ltd., ym pu em jia kamni waroh chi katu nadooh wa ya soi suskular wow e kreh ya ki tre chnong, tangwa hadien wa thied yaka Adhunik Cement Ltd. daka Dalmia Bharat Cement Ltd. na ki por cha ki por mih ki thut neidaw wa kani ka karkhana ym burom ko yaka soskular wa ka chnong.
Ha i por wa ka Dalmia Cement Bharat thied ko ya ka Adhunik Cement, ka Dalmia da kular ko wow burom yaka soskular, kamtæ ka dorbar chnong kawa pynman haka 10-09-2019 da iwi i yumut da rai ko wa lada ka Dalmia ym burom ko yaka chnong wa yaka soskular, ka chnong daw khang tala noh chi syndon ya kani ka karkhana ha kiwon kiwon ki por.
Kamtæ ka chnong da paan yarap ko naki bor sorkar, ki seiñbhalang, na ki synjuk rangbah chnong wa na ki chnong wa em marjan wow ya emlang wa ka chnong neibynta wow pynbait hajrong ini i lai lait yong ka Company kawa da ya soi wa ka chnong.
Discussion about this post