Maham khang kiwa puræ ka KNGC yaka College lada ym pynbiang ka sorkar ya ki dawa hapoh chi bnai

Shillong: Kiwa puræ ka Kiang Nangbah Government College da maham ki wow dam u chong Class yong ki lada ka sorkar ym ye ko wow pynbait ya i eh i khoo wa kani ka thaw puræ yachem ko hapoh chibnai.

Ya kani ka rai da chim da ka Kiang Nangbah Government College Students’ Union (KNGSU) hadien wa da dep wow kyntu ya u montri ka chnat puræ puthi u Lahkmen Rymbui yow leh u iyi iyi hajrong i dawa ka Union, hawa yachem ki wa oo ynne ka sngi.

“I da rai i wow e por chibnai ya ka sorkar wow pynbiang ya i dawa wa da booh i wei lada ka sorkar ym ye ko u leh ya ini ym yohsa de wow khang noh ya ka College,” da ong ka President ka KNGSU, ka Jerina Lamare.

Ha ka dorkhat wa da phah cha u montri, ka Union ka da dawa ko wow pynkrehkaam noh ya ka Girls Hostel kawa da dep chna, u pyndep noh ya i chna ya ka Boys Hostel wei wow pynku wei wow pynlait noh ya ka tulop ki Lecturer ka Morning Section.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Jerina Lamare da ong ko wa em kamwa 1000 ngut kiwa lai puræ Degree haka Morning Section kiwa da chah ktah khamtam wa kiwa sikai da dam noh ki neidaw wa ym su tulop ka sorkar da palat chisnem.

“I su ya kiwa sikai man ko kawa duna bha, kawa T. 5000 chibnai kawa duna yei hok wa toh u yoh ki,” da ong ko.

Da pyntip ko wa neiliang u montri da pyntip u wa ym em su tulop ka sorkar toh neidaw wa chitom poisa.

Ha iwi tawon i liang ka Jerina da pyntip ko wa u Rymbui da kular u wa ka sorkar u chimkhia ko wow pynbiang ya ki emkaam ha ki Hostel khnang wa kiwa lai puræ u ye ki u pynemkaam noh ya kini ki Hostel.

Katkam wa pyntip ka Jerina, ka Girls Hostel toh kawa da chna nadooh u snem 2012 wei katni da sah ko khlem pynemkaam hadooh katni kawa da wanrah yei chitom yei eh ya kiwa lai puræ kiwa da hap sah yungwai wei wow sah cha ki Hostel ki bru samen.