Hadien wa da yoh ujor na ki paidbah ka thaaiñ hajrong i tkhoh i krehaam ka Namdong CHC, neilang ka dkhot ka Khasi Student Union Namdong Area Unit, ynnin ka sngi da lai yachem wei da e ki leh dei thoh hajrong ini deiwa ong wa kani ka thaw sumaar ymye ko wow pdiang ya kiwa kjut neidaw wym em um kani ka CHC la chi bnai chiteiñ kattu.
Ka seiñ da ong ko ha u DM&HO ka West Jaiñtia Hills District, u Dr. KC Ajar wa ym sñiaw ye ko wow pdiang wa kat ka CHC ym yoh ko ya u Motor taan um uwa biang.
Neiliang u DM&HO da kular u wow chimkhia u pynbiang hapoh chi tayaaw heiwa ka seiñ da klam che ko wa lada ymye wow pynbiang um lane wow pdiang ya kiwa kjut ym yohsa ko wow khang tala lane wow chim da kiwi won ki laad ki luti ya kani ka CHC, wei kiwa toh u pait ya kani ka thaw daw hap ki wow chim yei kitkhlieh.
Ka seiñ da pynsñiaw ko leh ha u DM&HO hajrong i wym biang por kiwa kreh nadooh ki Chowkidar, ki Pharmacist wa kiwi kiwi.
