Hadien wa i jhep wa da lang ha Iawmusiang, Jowai kattu la kamwa chi tayaw da wan kit noh ya ki da ka Jowai Municipal Board (JMB) nadooh ynnin i miet wei iwa dang sah hajan Thomas Jones Synod College daw pynkhooid noh nadooh myntu.
Hajrong ini waroh neiliang ka Dorbar Chnong Tympang Iawmusiang lyngba u Waheh Chnong yong ka, u E. Shylla ynne hawa yaklam wa kiwa pathai khubor da ekhublei u ya ka JMB wa da khat ko ya ini i jhep.
Da ong u wa ka Iawmusiang man ko ka pliang ja kiwa boon hapoh Ri-loom Jaiñtia wei emkaam wow pynneh pynsah ya i khooid i jngiar hapoh yong ka.
Chooh chooh da ong u wa sñiawsih wow yoo wa ha ki sngi wa dadep da em wa wan noh da ki ksaw wa ki miaw wa yap ha i thaw wa lang i jhep iwa man i wym ye wow pdiang.
U Shylla da ong u leh wa lada kiwa chongdai noh khiar biang ki yei jhep, neiliang ka Dorbar Chnong ym yohsa ko wow khang ya ka yaw kattu katni sngi wow pynneh yei khooid deiwa kyntu ya ki paidbah wow burom ya ki rai ka chnong deiwa krehlang wa ka.
Heiyatoh won wa kiwa chondai harood sarok, u Shylla da ong u wa neipor cheipor ki bor chnong, ki bor District wa ki pulit da kyrriah ki ya ki narood sarok khnang wow pynneh yei khooid wei da kyntu u ya ki wow chong noh ha ki yaw ka Seiñraij, CNI wa kiwi kiwi khnang wow wanrah yei chngaaiñ wa i khooid.
