Jowai: Ki le tylli ki seiñbhalang wa kynthup yaka FKJGP-Jaiñtia Hills, ka Jaiñtia Students Movement (JSM)-Central Body waka KSU-Jaiñtia Hills Unit da thoh ki cha ki SP wa ki DC ka ri-loom Jaiñtia yow dawa na ki wow leh ki yeiwa emkaam heiyatoh wa i challan tooh yaki masi cha Bangladesh.
Kini ki le seiñ da ong ki wa haka yalang yong ki wa pynman haka 13 tarik uni u bnai, da yaklam yei duna i doh masi hapoh ka jylla Meghalaya iwa da mih nei challan tooh ya ki masi kamjooh yei ku dor i doh masi.
Da ong ki wa da pynemkaam yaka ri-loom Jaiñtia yow kit tooh ya ki masi na Ri-Bhoi District wa na Assam deiwa lai luti lyngba ka NH-6 nadooh na West Jaiñtia Hills cha East Jaiñtia Hills. Wei da em ki bru kiwa napoh ri-loom Jaiñtia hi kiwa yarap wow kit ya ki masi wei da pynhiar ya ki ha Umkiang lane ha Ratacherra wei neini da yah luti yaki dei kjat.
Ki le seiñ da pynsñiaw ki leh yei sñiawkhia yei noh ya ki masi wa da yap cha rood sarok ka Shillong Bypass ha ki bynta ka Ri-Bhoi District wa ha East Khasi Hills kamjooh cha ri-loom Jaiñtia iwa da ktah chiboon yaki paidbah wa lai wa wan nei sma tung iwa ktah leh yei chait i khiah.
Kamtæ ki le seiñ da e por ki hadooh ka 17 tarik uni u bnai ya ki DC wa SP ka ri-loom Jaiñtia wow pynsangeh yeini i challan tooh ya ki masi wei lada ym leh ki yeini ym yohsa ki wow booh da ki yong ki hi ki Check Point yow pait ya kani ka kaam nadooh ka 18 tarik uni u bnai.
Discussion about this post