Ka Hynñiewtrep A’chik National Movement (HANM) Jaiñtia Zone wa ka Federation of Khasi Jaintia & Garo People’s (FKJGP) Jaiñtia Zone da maham ki ya ki bru wa jooh noh jhep khamtam ki klong wa ki Plastic haki luti ki syngkieñ, ha sarokbah, ki sarok pohchnong wa ki loom ki wah.
Ini i maham ki seiñ toh hadien wa chem wa em ki bru wa noh ya kini ki jhep kat chawa yoh khamtam ha ki thaw paidbah ha East wa West Jaiñtia iwa da wanrah yei sah ki dooid wei iwa ktah ya ka rymaw wa i chait i khiah ki bru, da ong u Working President ka HANM Jaiñtia Zone u Pynshngaiñ Papang.
Da ong u wa ki jhep kam ki yuslæiñ khynnah (Huggies), ki Plastic wa noh khiar ha soodong sookun tooid ki cha ki wah iwa pynsih ya ka um wa pynemkaam ki bru paidbah.
Chooh chooh da ong wa ki wah wa boon ha kini ki ar District ym man de wow pynemkaam ya ki wei heiyatoh wa ka wah Umyurem ha Shangpung wa pynemkaam ki bru ha talawiar, ki ar seiñ da chem ki wa kani ka wah ym slem de daw man ko kam ka wah Umkhrah nei leh khlemakor ki bru.
Ki seiñ da maham ki wa lada chem wa noh jhep khlemakor ki bru hajan ka wah Umyurem, daw pynchitom ya ki katkam ki kyndon aiñ.
U Organizing Secretary ka FKJGP West Jaiñtia Zone, u Wompher Wann da ong u wa ki ar seiñ daw pait bha ki hajrong ini khnang wow yada ya ki wah wa ka rymaw.
Da kyrpaad leh ya ka sorkar wow booh noh ya ki Recycling Plant (wow pynkylla ya ki Plastic cha kiwi ki mar) ha waroh ki ar tylli ki District.
