Jowai: Ha ka chi tarik uni u bnai ki 14 tylli ki chnong wa haap hapoh ka Elaka Sumer kiwa chaniah wow lai luti lyngba ka yingkieñ Rimanar kawa em ha Samasi da lum lang ki wow sylli yei maa hajrong ki dak wa da piah kani ka yingkieñ wei da emlang leh waroh ki waheh chnong wa kiwi kiwa yahkhmat ki chnong chynrang wa kynthai, u Acting Doloi u Khmih Manar, ki dkhot ka KSU na Jaiñtia Hills wei da em leh neiliang ka sorkar u Banteilang J Kharshandi (MCS) uwa man kam u BDO ka Saipung C&RD Block.
Ya ini i wan wow sylli ya kani ka yingkeiñ toh hadien wa leh khlemakor wei wym burom ki kari heh wow kit mar palat ya ka 9 ton wot hadien wa da pynkrehkaam leh ya ka kyndon 144 CrPc neidaw wa da sdang sih kani ka yingkieñ kawa da wanrah yei maa ya ki paidbah kiwa pynemkaam ya ka. Wei neiliang u BDO leh da ong u wa daw thoh u cha u DC waka PWD yeiwa chem u.
Iwa pynphylla ya ki paidbah toh wa du hadien kattu katni kynta wa wan sylli ya kani ka yingkieñ da em wot ki truck wa kit mar palat pood kiwa pynemkaam ya kani ka yingkieñ wei neiliang kiwa kreh ka PWD leh ym emlang ki ha kani ka sngi kamwa da pynbait.
Neiliang ki waheh chnong, da suba joor ki wa em iyi re iyi wa ki tre kari da leh sop sop ki wa ki bor sorkar wei da dawa ki waheh chnong wa u Acting Doloi wow kem wow pynchitom ya ki waroh kiwa emkti wow tyngkheiñ ya ka aiñ wei u yang sa du kattu katni sngi lada ym chimkhia ki bor district yeini i kaam daw lai rah ya kani ka kaam cha ka Meghalaya High Court.
Discussion about this post