Maham pynman yakhih ka JSM lada ym pynkylla ka sorkar ya ki kyndon khih mooyong

Ka Jaintia Students’ Movement (JSM) da phah dorkhat ko cha u Montri Rangbah ka jylla Meghalaya lyngba u Deputy Commissioner ka East Jaiñtia Hills District haka 11 tarik uni u bnai.

Ha ka dorkhat da ong wa nadooh wa khang yei tih mooyong Rat Hole Mining ha u snem 2014, da ki hajar ngut ki paidbah da chah ktah joor ki hei kamai kajih yong ki tangwa ka sorkar da suki hi-eh ko yeini wa chem chitom ki paidbah.

Ka JSM da pynsñiaw ko wa wot ka Supreme Court da e bor ko wow leh da ka Scientific Mining, tangwa dang du 4-5 ngut kiwa da yohbor wow leh yeini i kaam wei kiwa boon ki paidbah ym ye ki wow lai chakhmat neidaw ka SOP wa pynmih da ka sorkar Meghalaya haka 05-03-2021 kawa em ki kyndon kiwa khor bha.

Katkam ka SOP da kdaw wa u e Prospecting Licence wa Mining Lease toh neibynta kiwa em thaw wa heh ym duna ya 100 Hectare wei ini da man ko iwa eh bha ya kiwa kih mooyong wa em yei thaw wa khian, tangwa ka seiñ won da kdaw ko wa ha ka aiñ MMDR Act 1957 ym em kam kani ka kyndon tangwa da e buit donhi wa ka Mining Lease ymtoh u duna yei heh wa 4 Hectare.

Related posts

Ka sorkar wa hap u bahkhlieh yeiwa jia ha Thangskoo, kammon u e daw wym tip ki: KSU EJHDU  

February 12, 2026

Sdang hiar wei hær ki lieñsuiñ ka IAF ha ka ELF wa nyngkong ka Northeast wa em ha u National Highway

February 12, 2026

Ka JSM ong ko wa kani ka SOP ka sorkar toh du yow myntoi kiwa hehspah wa ki tre mooyong wa em ki thaw wa heh, kamtæ ka sorkar hap ko wow pait biang sa chisien ya kini ki SOP.

Heiyatoh wa i jia wa sñiawsih ha Thangskoo haka paar mooyong pyrchah aiñ, ka JSM da dawa ko wa toh u em ka takit kawa bniah wei kawa khooid wei wow booh leh yei kitkhlieh ha kitu kiwa toh u pait ya ini i kaam ki wym em leh yeiwa emkaam.

Ka seiñ da ong ko wa ka sorkar em ko ka poisa yow su bai yarap cha kitu kiwa maad yei sñiawsih neiwa jia ha Thangskoo, wei da toh leh wow e yarap poisa ko cha ki tre mooyong wa khian khnang yow ye ki wow pynkhreh Mining Lease wa ki kot ki sla katkam ka aiñ, khnang wa ki khon ka ri u yoh ki ka laad kamai kajih.

Da pynkut deiwa maham wa lada ka sorkar ym ye ko wow pynkylla ya ki kyndon SOP wei wow kular u e yarap yow yaleh pynyoh Mining Lease cha kiwa khih mooyong chwa wow kut u March 2026, neilang ka seiñ daw khut yalang ko wa ki tre paar mooyong ka Jaiñtia Hills yow pynman da ka yakhih wa heh yow ap u sñiaw ka sorkar.