Maham sa seiñ kiwa kamai Tourist ya kiwa chim kabu yaki paidbah

Hadien wa mih boon ki ujor wa i ood i naam na kiwa lai wa wan kiwa pynemkaam da ki kari kamai kiwa em hapoh West Jaiñtia Hills wa ha East Jaiñtia Hills District, ka seiñ All Jaintia Tourists & Commercial Vehicle Association (Central Body) kawa toh u pait ya i bha i miat ya ki kaam kamai kari hapoh West Jaiñtia Hills wa ha East Jaiñtia Hills District, kwah ko u pynche sa chisien heiyatoh wa ka bai kari wa i rukom thap bru (Passenger) wa nadooh wa sdang ka khlam hadooh katni dang man i jooh hi kat wym pu yoh hukum da kawi tawon na ka sorkar. Ka seiñ kiwa kamai kari da dep khana ko ya waroh kiwa yah kari kiwa em hapoh ka Association wym hoi wow chim kabu ya kiwa lai wa wan da ki kari kamai, hap ki wow bood ya ki kyndon wa booh da ka sorkar chirup wa ki bor sorkar kiwa em hapoh District.

Hapyrdi ki eh kiwa boon wa yachem kiwa kamai kari, nalor wa ku ka rukom su kot kari, ki dan (Tax) waphær waphær, wa sa i ku dor i Petrol wa i Diesel, wa kiwi kiwi ki jait su, kamtæ neiliang kiwa kamai kari da ong ki wa da pyrchang ki wow chakri ya ki Passenger wa maya yong ki, da pyrchang ki leh wow bood ryntih ya ki aiñ ki kyndon wa e da ka sorkar wot hapyrdi i dooh nong ki iwa khroo kam i nong nei kamai kari wa chem ki ha kini ki por ka khlam.

Neiliang ka seiñ kyrpaad ko ya kiwa lai wa wan da ki kari kamai wow sñiawbha u yaichah wa ki deiwa e ka kti timun tidiang yong ki, deiwa ya krehlang chirup chirup yow ye u chakri rap bha ya ki kiwa lai wa wan da ki kari kamai na iwi i thaw cha iwi tawon. Kyrpaad ki leh lada em iwon iwon i eh wa yachem ki heiyatoh wa i lai i wan lane lada em kiwon kiwon kiwa yah kari wa chim kabu wow sñiawbha u yakrehlang deiwa pyntip ki cha ka seiñ ya ki Number kari kiwa leh tam wei ye leh wow yachem wa kiwa kitkaam yong ka seiñ kawa pdiang sñiawbha ya iwon iwon i e yumut yong phi neibynta i bha i miat ha ka imlang sahlang.

Khaddooh ka seiñ da maham ko ya kiwon kiwon kiwa yah kari kiwa chim kabu ya kiwa lai wa wan da ki kari kamai wei lada ka seiñ chem ko ya kiwa leh pyrchah, ym em ko i kitkhlieh ya ki wei daw pynchitom ko ya kiwon kiwon kiwa leh palat ki aiñ yong ka Association.