U MLA ka Nongkrem uwa man leh heijooh i por u Chairman yong ka Meghalaya State Planning Board, u Lambor Malngiang da maham u wow khang noh ya u sarok PWD wa lai luti na Assam Rifle ha Kynton-U-Mon, Lad Nongkrem lada ki chipai kiwa em ha katai ka thaw u pteiñ ki wow pyndik ya kiwa chong chnong.
Ynne ka sngi u Lambor da lum jhan u ya ka yalang wa ki heh sorkar wa ki bor pynlai District ka East Khasi Hills, nadooh u Superintendent of Police, ka Deputy Commissioner, Secretary ka Home, ki Magistrate, ki heh ka chnat PWD wei da emlang leh u Brigadier Singh na ka Assam Rifles, wow yaklam hajrong i chah dat kiwa chong chnong ha i janmiet yong ka 25 tarik uni u bnai ha ki chipai kiwa pait ya khyrdop kawa em ha u surok PWD kawa lai cha Pomlakrai wa Umïew.
Hawa klam hadien ka yalang, u Malngiang da ong u wa katai ka sarok da dep ko wow em nadooh i por wym pu yoh ya ka jylla, wei da pyntip u leh wa da dep yaklam da iwa eh hakhmat u heh chipai wa lada pteiñ ki wow pyndik ya ki paidbah, ym yohsa wow khang ya utai u sarok wow psiah u mih ki ki chipai.
Da ong u wa ka sorkar daw pynkreh ko wut wut ya u sarok waroh kawi, neibhah waroh chi kattu ka chnat PWD da jooh pynkreh du nadooh Kynton-U-Mon hadoh phalor ki chipai, katwa chapoh ka pchem ym jooh leh wei da muchlia da ki chipai kawa da pynman ya ki wow kamtre syndon ya i thaw. Da pyntip u wa da phah ya u SE ka chnat PWD wow kynthuplang ya ka sarok hapoh i pynlai ki chipai.
U Malngiang da pyntip u leh wa ha ka yalang, u heh chipai da kular u wow kem wei pynchitom ya kitu ki chipai kiwa tab kti ya ki paidbah wa lai wa wan wei wow ekti ya ka takit ha ki pulit ka jylla, heiwa da phah leh ya u SP ka East Khasi Hills wow chimkhia hajrong i ujor da kiwa chong chnong pyrchah ya ki chipai.
